Hibaika eta Sanpedrotarrak bandera bana ekarri dute etxera asteburuan
Lider mantentzen da 'Libia' KAE1-en, eta Hondarribiarekin puntutan berdinduta, baina bigarren, da Hibaika ETEn. KAE2-koak ere uretaratu dira.
[Argazkia: Hibaika AE]. 
Larunbatean KAE1-eko hirugarren jardunaldia eta ETEko laugarrena hartu zituen Castro Urdialesek (Espainia). Gizonezkoek beste hitzordu bat izan zuten atzo, Elantxoben (Bizkaia); eta beste bina KAE2-ko arraunlariek.
Emakumeek bost kaleko modalitatean egin zuten arraun herenegun, sarrera librearekin, bi luze eta ziaboga bat bete behar izan zituztelarik. Gizonezkoek, aldiz, lau kale eta sarrera librea, guztira lau luze eta hiru ziabogarekin. ETEn 9 traineruk hartu zuten parte, bi txandatan. KAE1-en, 12 ontzi, hiru txandatan.
Hibaika nagusitu zen sasoiko laugarren norgehiagokan, bandera eskuratu zuelarik Hondarribiari 10 segundo pasatxoko aldea aterata. Dena den, eta puntutan berdinduta badoaz ere, Ama Guadalupekoa lehen da gaur-gaurkoz sailkapen orokorrean, eta atzetik Errenteria-Oreretako emakumeen trainerua.
KAE 1
Sanpedrotarrek lehen egin zuten Castro Urdialesen, bigarrenekiko (Zarautz) 10 segundoko aldearekin, gainera. Sanjuandarrek seigarren bukatu zuten estropada, eta bederatzigarren Hondarribiak.
Gizonek, baina, ez zuten atseden hartzeko astirik izan, hurrengo egunean, igandearekin, Elantxobeko XXXIV Traineru Estropada izan baitzuten jokoan, eta orduko horretan Zarautz nagusitu zitzaien, lehen eta bigarren postuak elkartrukatuz aurreko egunekoarekiko.
Errekak eta Ama Guadalupekoak larunbatean baino hobeto egin zuten, biek ala biek postu bat gorago bukatu zutelarik estropada (bosgarren eta zortzigarren, hurrenez hurren).
Gauzak horrela, moreek lidergoa mantentzen dute oraindik ere sailkapen orokorrean; horra hor KAE1-eko palmaresa:
| 1º | SANPEDROTARRA | 45 |
|---|---|---|
| 2º | ZARAUTZ GESALAGA OKELAN | 40 |
| 3º | ARKOTE SEGUROS BILBAO | 37 |
| 4º | S.D.R. PEDREÑA | 34 |
| 5º | SAN JUAN | 32 |
| 6º | MATRIX HONDARRIBIA | 25 |
| 7º | CAMARGO CUEVA EL PENDO | 24 |
| 8º | CASTRO BRUNO SAEZ | 24 |
| 9º | DELTECO ZUMAIA | 21 |
| 10º | DEUSTO BILBAO | 15 |
| 11º | ORIO ORIALKI | 8 |
| 12º | BUSTURIALDEA | 7 |
KAE 2
Gizonen hirugarren mailakoek ere asteburu lanpetua izan dute, egun bakoitzeko estropada bana lehiatu dutelarik Oarsoaldeko ordezkari Trintxerpe eta Hibaikak. Larunbatean Yurrita Group VI Bandera eskuratzeko egin zuten arraun Mutrikun. Laugarren sailkatu zen Hibaika eta azken Illunbe.
Atzo hiriburuan izan ziren, Ur Kirolak 100-XII Bandera Donostiarra estropadarekin. Pasaitarrek postu berbera mantendu zuten, eta hobeto egin zuten errenteriarrek, bigarren bukatu baitzuten norgehiagoka, Lapurdiren atzetik.
Esandakoekin, horra hor kategoriako sailkapen orokorra:
| 1º | LAPURDI ANTTON BILBAO | 27 |
|---|---|---|
| 2º | HIBAIKA SUSPERREGI EDUKIONTZIAK | 19 |
| 3º | DONOSTIARRA | 18 |
| 4º | MUTRIKU | 18 |
| 5º | PORTUGALETE | 16 |
| 6º | ASTILLERO | 16 |
| 7º | IRC SANTOÑA | 9 |
| 8º | CASTRO MARINERA | 9 |
| 9º | TRINTXERPE | 3 |
