Eguzki, kezkatuta Papresako aire zabaleko lohien manipulazioarekin
Talde Ekologistak idazki bat bidali dio udalari lanen lizentziagatik eta ingurumenean eta osasunean izan dezaketen eraginagatik galdetzeko.
Nafarroa etorbideko espaloi publikoa hartu du lohiak. Papresa aire zabalean lohiak biltzen eta kargatzen aritu da Nafarroa etorbideko 17. eta 19. eraikinen parean. Eguzki Talde Ekologistak salatu duenez, “hasiera batean enpresaren lurrak okupatzen zituzten arren, lohiek Papresaren mugakide den espaloi publikoa hartu dute”.
Lehenik, manipulazio horrek “usain txarrak” sortu dituela eutsi dute. Horrez gain, Eguzkiko kideek ez dakite “aire zabalean egindako lan horietan lixibaturik sortu den”, baina “hipotesi guztiek baietz pentsatzera” eramaten dituztela baietsi dute.
Sortutako egoerak “asko kezkatzen” dituela azaldu dute Eguzkitik: “Neurri egokiak hartu ez badira, besteak beste, lohiak pilatzeko perimetroa mugatzea posible da. Alde batetik, lur-iragazteagatik edo euri urak biltzeko sistemagatik ibaian bukatu izana, ura kutsatuz; edo atmosfera agente kutsatzaileak bota izana, osasun publikorako arriskua eraginez”. Hipotesi horiek “baieztatuko” balira, “ingurumen delitu baten aurrean egongo ginatekeela” nabarmendu dute Eguzkitik, eta “Administrazioak esku hartu” beharko lukeela “delitu” horren aurrean.
Sortutako egoera argitzeko helburuarekin, Eguzki Talde Ekologistak idazki bat bidali dio Errenteriako Udalari, eta informazioa eskatu diote “lohia biltzeko eta kudeatzeko lanek lizentziarik zuten zehazteko, eta ingurumenean eta osasunean izan dezaketen eraginari buruzko kontrolak ezarri diren jakiteko”.
