[Galeria] Bota dute txupinazoa; hasi dira sanferminak!
20:00etako kanpaiekin batera bota dute txupinazo eta hasi dira, bi urteko geldialdiaren ostean, Antxoko jai zuri-gorriak ospatzen.
Gaizka Brea eta Oier Iribarren, elizaren teilatuan. 
Bota dute txupinazoa. Hasi dira 2022ko Pasai Antxoko San Fermin Jaiak. Ageriko egin dute antxotarrek zuri-gorriz ospatzeko gogoa, gainezka baitzegoen Gure Zumardia 20:00ak jo eta jaiei hasiera eman dien suziria bota dutenean.
Urko Etxebeste antxotarrak egin du jaien aurkezpena oholtza gainean, eta eskaini dizkio hitz bereziak hark ere aurten zendutako Juanjo Bujanda Buji-ri. Sanferminen sua ez du hark piztu aurten, baina oinordetzan jaso du bere seme Borjak ardura; eta bete du. Bujiri, berriz, eskerroneko hitzak besterik ezin izan dizkiote esan gaurkoan ere.
Bujandarena ez da aurtengo besterentze bakarra izan: Oier Iribarrenek eskalatu izan du azken urteotan eliza, goiko dorrera txupinazoaren suziria eramateko. Aurten, ordea, eskura eman dio testigua Gaizka Brea antxotarrari, eta hura izan da, 20:00ak baina apur bat lehenago, eraikineko fatxadan gora egin duena.
Hasi besterik ez dira egin sanferminak… Hemen klik eginda ikus daiteke egitarau osoa. Jarraian, berriz, txupinazoak Antxon utziriko zenbait argazki.
