Udalak asebetetze eta beharrei buruzko inkesten emaitzak aurkeztu ditu
600 herritarrek hartu zuten parte maiatzean egin ziren inkestetan, eta udalerriaren, Udal Gobernuaren eta udalak ematen dituen zerbitzuen inguruan galdegin zitzaien.
Eñaut Gracia, Aizpea Otaegi eta Maite Gartzia. Errenteriako Udalak sustatuta, Aztiker Soziologia Ikerguneak inkestak egin zituen maiatzean herritarrek udalerriaren, Udal Gobernuaren eta udalak ematen dituen zerbitzuen inguruan duten iritzia jasotzeko. Inkesta horiek bi urtetik behin egiten dira 2016tik, beraz, honakoa izan da bideratzen diren laugarren aldia, eta antzeko egitura duenez, konparazioak egitea errazten du. Horrez gain, gardentasun ariketa bihurtzen dira, gardentasun atarian baitaude eskuragarri.
Guztira 600 inkesta egin zaizkie Errenteria-Oreretan bizi diren 18 urtetik gorako herritarrei, eta gaur ezagutarazi dituzte jasotako emaitzak Aizpea Otaegi alkateak, Maite Gartzia Kultura eta Kirol zinegotziak eta Eñaut Gracia Gizarte Zerbitzuetako zinegotziak. Parte hartu duten 500 pertsona ausaz hautatu dira eta gainerako 100ek kontrol-lagin bat osatzen dute, talde horren iritzia denboran zehar nola aldatzen den ikusteko.
Udal ordezkariek azaldu dute inkesta horietan jaso diren iritziak eta ondorioak garrantzitsuak direla Errenteriako Udalarentzat, horien bidez martxan dauden edo abiatuko diren proiektuak eta udal politikak definitzeko zein birorientatzeko lagungarriak direlako.
Udalerriarekiko asebetetze-maila eta arazo nagusiak:
Herritarren batez besteko asebetetzea Errenteria-Oreretari dagokionez, 10etik 7,9koa da, eta gehienbat garraio publikoari dagokionez udalerriak dituen loturak, herriko giroa, eskaintza kulturala eta bizimodu lasaia nabarmendu dituzte.
Bestalde, kezka nagusi bezala, bi nabarmendu dituzte herritarrek: aparkaleku eta segurtasun falta.
Udal Gobernua eta kudeaketaren balorazioa:
Udal Gobernuaz galdetuta, inkestadunek eman dituzte erantzunen arabera, balorazio orokorra 10etik 6,8koa da, eta %68,4k uste du “Errenteriako arazoak konpontzen ari dela”eta badakiela nola konpondu, baina denbora gehiago behar duela”. Oposizioari dagokionez, %26,8ak dio “ez duela ez laguntzen, ezta oztopatzen ere”.
Horrez gain, hainbat zerbitzuri eta auzo bakoitzak jasotzen duen arretari buruz galdetuta, ezberdintasunak antzeman dituzte. Balorazio positiboena Erdiguneko, Olibeteko eta Etxe Berrietako bizilagunena da; eta negatiboena berriz, Galtzaraborda eta Iztietakoena.
Egungo eta etorkizuneko proiektuak
Gai zehatzei dagokionez, udal ordezkariek esparru batzuetan antzemandako pertzepzio ona nabarmendu dute; hala nola, udaletxera joatean jasotako arretari, kultura eskaintzari, tokiko merkataritzaren eta ostalaritzaren sustapenari eta kirol instalazioen eskaintzari.
Etorkizuneko ardatzei dagokionez, herritarrek garrantzitsutzat jo dituzte gazteen eta adinekoen beharrak asetzearekin, azpiegiturak eta instalazioak hobetzearekin eta tokiko ekonomia indartzearekin zerikusia duten neurriak.
Azkenik, proiektu zehatzei buruz galdetuta, indarra hartu dute gazteen emantzipazioa sustatzearekin, bakarrik bizi nahi ez duten adinekoentzako etxebizitza alternatibak eskaintzearekin, adinekoen zaintzan gehiago inbertitzearekin eta tokiko merkataritza eta ostalaritza sustatzearekin lotutakoek.
