Denboraldia bukatzeko, Txupinazo Festa antolatu du Zintzilik Irratiak
Hilaren 21ean izango da, madalenak hastearekin batera, 17:30etik aurrera. Horretarako, egitarau zabala osatu dute Zintzilikeko egoitzan.
Zintzilik Irratiaren egoitza. Madalenak gainean dira, eta herriko jaiak hastearekin batera, Zintzilik Irratiak 37. denboraldiari bukaera emango dio. Sasoia ixteko, gainera, saio berezia egingo dute hilaren 21ean madalenetako txupinazoaren emisioarekin. Emanaldi horretan, irratiko kideez gain, gonbidatuak, musika eta kontzertuak izango dira.
Madalenetako txupinazoa emateaz gain, festa bat egingo dute Zintzilik Irratiaren egoitzaren beheko solairuan (Tomas Lopez kalea, 17). Irratiko kideek herritar guztiak gonbidatu dituzte festara berotasuna eta elkartasuna adierazteko.
Honakoa da hilaren 21eko Txupinazo Festaren egitaraua:
- 17:30ean: Txupinazo saio bereziaren hasiera. Saio hori irratira gerturatuz, FM 100ean edo streaming bidez jarraitu ahal izango da Zintziliken webgunean.
- 19:30ean: Barra irekiera merienda, edaria eta janarekin.
- 20:00etan: Musika zuzenean Ilargi eta Matxardaren eskutik.
Udan, programaziorik ez
37. denboraldiari bukaera ematearekin batera, udan programaziorik egongo ez dela zehaztu dute Zintzilikeko kideek, baina entzuleek komertziala ez den musika aukeraketa batez gozatzeko aukera izango dute.
Horrez gain, irailetik aurrera, 38. urteurrena prestatzeko zereginetan hasiko direla baietsi dute. Proposamen ugari bideratuko dituzte, denborarekin helaraziko dituztenak. Bukatzeko, irratiko kideek Zintzilik Irratian parte hartzera animatu dituzte herritarrak.
