Trafiko eta aparkaleku aldaketak Karmengo Jaietarako
Trintxerpen Karmengo Jaiak ospatuko dira aurki. Hala, udalak zenbait aparkaleku egokituko ditu, eta trafiko aldaketak egongo dira.
Euskadi etorbidean trafiko aldaketak egingo dira, Karmengo Jaien harira. Karmengo Jaiak datorren uztailaren 14ean, ostegunean, hasiko dira Trintxerpen, eta uztailaren 17ra arte iraungo dute. Hori dela eta, udala buru-belarri dabil prestaketa lanetan. Gaurkoan jakinarazi duen moduan, Lasa eremuan barrakak jarriko direnez, kotxeak aparkatzeko zenbait behin behineko gune egokituko dira:
- Toro eta Betolaza eremua: uztailaren 11ko, asteleheneko, goizeko 08etatik uztailaren 19ko, astearteko, 23:59etara egongo da erabilgarri.
- Gudari plazaren pareko aparkalekua (barreraduna): uztailaren 14tik 17ra egongo da erabilgarri.
- Aduana kalea (portutik ateratzeko bide nagusia): Uztailaren 16tik uztailaren 17ko 23:59etara aparkatzeko aukera egongo da, betiere baterian eta garajeetako ateak libre utziz.
Udalaren arabera, Lasa eta Zirizako aparkalekuak kotxerik gabe egon beharko dira uztailaren 12ko, astearteko, goizeko 08:00etarako.
Beste alde batetik, udaltzaingoak zenbait ohartarazpen egin ditu ere, trafiko mozketei dagokienean. Euskadi Etorbidea uztailaren 12an, asteartea, itxi egingo da San Pedroranzko norabidean 13:00etan; eta bi norabideetan uztailaren 14ko, osteguneko, goizeko 08:00etatik uztailaren 18ko, asteleheneko, 10:00ak arte. Beharren arabera hustuko dute, eta guztiz hutsik egon beharko du uztailaren 14ean, ostegunean, goizeko 08:00etan.
Andonaegi kalea, kontzertu bat dela-eta, itxi egingo da uztailaren 15ean, ostiralean, antolatzaileek zehaztu beharreko ordutegian. Baina arratsaldeko 20:00etatik goizeko 01:00era, trafikoa Marinelen igoeratik desbideratuko da, eta aingurako biribilgunean seinaleztatu egingo da.
Ulia Etorbidea itxita egongo da 1-3 trafikoarentzat igandean (hilak 7), goizeko 11:00etatik arratsaldeko 18:00etara. Izan ere, bertan herri bazkaria eta jolasak egingo dira. Ulia 3ko garajeetara sartu ahal izango da, dena den.
Errenteria kalera sartzeko, ibilgailuak Ulia etorbidetik Azkuene 32ra heldu beharko dira, eta biribilgunetik sartu.
