Euskaraldiaren hirugarren edizioan arigune izateko aukera, zabalik
Herriko eragile, komertzio edo enpresak izan daitezke. Helburua euskaraz lasai aritzeko gune eroso eta aproposak sortzea da.
Argazkia: Ximun Leturia 2022ko azaroaren 18tik abenduaren 2ra Euskaraldiaren hirugarren edizioa izango da, eta Errenteria-Oreretako Herri Batzordeak prestaketa-lanetan dihardu. Urtarrilean hasi ziren biltzen, eta apirilaren 28an egin zuten aurkezpen ofiziala. Aurreko bi edizioetan bezala, ahobiziz eta belarriprestez bete nahi dute herria, baina baita arigunez ere. Izan ere, azken edizioan sortutako ariguneek ariketa pertsonal eta kolektiboa aurrera eramateko aukera ematen dute, kalez kale euskaraz lasai aritzeko gune eroso eta aproposak sortzen baitituzte.
Horretarako, herriko eragile, komertzio eta enpresei arigune izan daitezen dei egin diete. Izen-ematea webgune honetan egin dezakete edo herriko batzordearen helbidera idatzi. Norbanakoek izena emateko epea irailean irekiko da.
