Laguntzak enpresentzat, eskualdeko langabetuak kontratatzeko
Oarsoaldea Garapen Agentziak abiarazitako egitasmoa da, eskualdean erroldatuta dauden 96 langabetu kontratatuak izan daitezen.
![](https://oarsoaldea.hitza.eus/site/files/2022/07/zap.png)
Oarsoaldea Garapen Agentziak, Berpiztu programaren baitan, eskualdeko langabetuak kontratatzeko laguntzak iragarri ditu enpresentzat. 2021eko irailaren 1etik 2022ko urriaren 31ra arte hasitako kontratuetarako diru-laguntzak izango dira. Hauek dira laguntzak jaso ahal izateko enpresek bete beharreko baldintzak:
- Lantokia Gipuzkoan izatea.
- Edozein kontratazio-modalitate onartuko da, prestakuntzarako eta ikaskuntzarako kontratuak izan ezik.
- Gutxienez 6 hilabeteko kontratua eskaintzea, lanaldi osokoa.
- Enpresa bakoitzak 3 kontrataziorako muga izango du.
- Diruz lagundutako kontratu bakoitzeko laguntzen gehieneko zenbatekoa 6.000 eurokoa izango da, baina laguntzaren azken zenbatekoak ezingo du soldataren %75 gainditu.
- Laguntza 6 hilabete igaro ondoren likidatuko da, kontratazioaren baldintzak eta denbora egiaztatzen direnean.
Kontratatutako pertsonek, ordea, honako baldintzak bete beharko dituzte:
- Eskualdean erroldatuta egotea
- Langabezian egotea eta Lanbiden enplegu-eskatzaile gisa izena emanda eta alta emanda egotea.
- Enpresa eskatzailearekin lan-harremanik ez izatea diru lagundu beharreko kontratua hasi aurreko 6 hilabeteetan.
Eskaerak telematikoki aurkeztuko dira, Oarsoaldeko webgunearen bitartez. Eskabideak jasotzen diren neurrian ebatziko dira, eta horiek aurkezteko epea deialdia egiten den 96 lanpostuak betetzen diren unean amaituko da.