Listorreta parkeko udako abenturetako lehena, larunbat honetan
Saguzarrak hurbiletik ezagutzeko aukera izango da. Abuztuan zehar ere beste zenbait ekintza antolatu dituzte.
Larunbat honetan, uztailaren 16an, emango diote hasiera Listorretako aisialdi guneak antolatzen dituen udako jarduerei. Lehenengoak saguzarrak hobeto ezagutzeko aukera emango du. Oinarrizko azalpenak emateaz gain, detektagailu batzuen bidez animalia horiek entzuteko aukera izango da, eta, arretaz begiratuz gero, baita ikusteko ere. Ane Castro adituak gidatuko du, eta euskaraz eta gaztelaniaz izango da.
Baina hori ez da prestatu duten udako jarduera bakarra. Abuztuaren 13an, familientzako orientazio-jolas bat antolatu dute. Abuztuaren 15ean eta 27an, aldiz, Aiako Harria Parke Naturala ezagutzeko ibilaldi motzak prestatu dituzte.
Jardueretan parte hartu ahal izateko, aurrez izena eman beharko da. Horretarako, 943 495 069 telefono zenbakira deitu edo posta elektronikora mezua bidali behar da.
Gogoratu Listorretako informazio-gunearen ordutegia honakoa dela: ostegunetan 8:30etik 14:00etara; eta ostiral, larunbat, igande eta jai egunetan 8:30etik 14:00etara eta 15:00etatik 18:30era.
