Badalab hizkuntza berrikuntzako laborategia aurkeztu dute
Madalen kaleko 27. zenbakian dago kokatua, liburutegi zaharra zegoen lekuan, eta helburua da euskara biziberritzeko eta hiztunen arteko berdintasuna sustatzeko esperimentazio gune erreferentziala bilakatzea.
Markel Olano, Goiatz Oiartzabal, Aizpea Otaegi, Mikel Irizar eta Olatz Olaso. Badalab hizkuntza berrikuntzako laborategia martxan da, eta gaur goizean aurkeztu dute Goiatz Oiartzabal Badalabeko zuzendariak, Aizpea Otaegi alkateak, Markel Olano diputatu nagusiak, Mikel Irizar Badalabeko lehendakariak eta Olatz Olaso Badalaben lehendakariorde eta erakunde sozialen ordezkariak. Gune berri hori Errenteria-Oreretako Madalen kaleko 27. zenbakian dago kokatua, liburutegi zaharra zegoen lekuan. Eraikineko azken bi solairuetan du egoitza laborategiak.
Badalab Hizkuntza Berrikuntzako Laborategia Gipuzkoako Foru Aldundiak bultzatutako ‘Etorkizuna Eraikiz’ programaren barrukoa da. Badalaben helburua da euskara biziberritzeko eta hiztunen arteko berdintasuna sustatzeko esperimentazio gune erreferentziala bilakatzea. Horrez gain, gune horren beste egiteko nagusi bat da euskara etorkizuneko agertoki eta interakzio sistema berrietan erabilia izan dadin, esperimentaziotik ekarpena egitea. Dena prest dute, eta irailetik aurrera hasiko dira buru-belarri.
Goiatz Oiartzabal da Badalaben zuzendaria, eta zenbait egitasmoren inguruan mintzatu da: “Berrikuntzak etorkizunera garamatza eta etorkizuna bete-betean biziko duten pertsonei galdetu behar zaie. Haien irudikapenetik abiatzen gara, etorkizun horretan euskarak eta hizkuntza gutxituek toki duina izan dezaten, komunitatea bere osotasunean garatzea ahalbidetuko duen balio.sistemari esker”.
Badalab gunea sortzeko bi erakunde izan dira ezinbestekoak: Gipuzkoako Foru Aldundia eta Errenteriako Udala. Hori dela eta, bi erakundeen ordezkari gorenek hartu dute parte gaurko aurkezpenean. Aizpea Otaegi alkatea: “Bizi dugun ziurgabetasunean, argi pixka bat jartzera dator Badalab. Gure buruari egin beharreko galderak zein diren ere zalantzan jartzera dator, gure buruari egin beharreko galderak ere zein izan daitezkeen pentsatzeko gonbidapenarekin datorrelako”.
Markel Olanoren aburuz, paradigma berriek hizkuntza gutxituei “modu nabarmenean” eragiten diete, eta euskara salbuespena ez dela azaldu du: “Garai berriek tresna, proiektu eta baliabide berriak eskatzen dituzte, eta ahalegin horretan akuilu izango da Badalab. Aniztasunetik abiatuz, elkarlan zabal bat aktibatuz, ikuspegi eraldatzaile bati helduz, euskararen etorkizuna indartzeko tresna berritzailea da”.
Saioaren bukaeran, Oiartzabalek aurrera eramango diren egitasmoen artean bi nabarmendu ditu. Alde batetik, gazteekin batera, prozesu espekulatibo bat egingo da. Etorkizuna irudikatzeko espekulazio prozesuaren oinarria da desiragarritasun klabean garatzen dela. Ulertu nahi da gazteek nolako etorkizun desiratua irudikatzen duten, gero horretan nola eragin antzemateko. Bestetik, Errenteria-Oreretan aniztasuna lantzen duten eragileekin batera abiatuko den lanketa, hizkuntzaren aldagaia, gizarte kohesioa eta komunitategintza uztartzeko.
