Lezoko EH Bildu: "Elebakartasun guneak behar ditu euskarak Lezon"
Lezoko EH Bilduk kezka adierazi du euskararen kale erabilerak izan duen beherakadagatik. Neurriak proposatu ditu.
Kezka azaldu du Lezoko EH Bilduk euskararen kale erabilera jaitsi delako. Datuek adierazten dute, koaliziokideen ustez, herriko erabileraren beheraldia berretsi egin dela, “eta bestetik haurren eta gazteen arteko erabilera maila kaskarra begien aurrean jartzen digute, susmo txarrenak egiaztatuz”. Horren aurrean neurriak proposatu ditu EH Bilduk, norberaren esparrutik barru-hausnarketa bultzatzeko eta aldi berean eragile izateko. “Elebitasun sistematikoak kalte egiten dio dagoeneko euskararen garapenari. Elebakartasun lerroak edota guneak behar ditu euskarak Lezon”.
Herriko Euskararen Herri Batzordeak aitortza eta errespetua merezi dituela nabarmendu du koalizioak. Baina “euskarak merezi duen lekua eta tratua izan dezan” dei berezia egin die lezoar guztiei, eta batez ere helduei, ardura pertsonala hartzeko garaia iritsi dela iritzita. “Ezin diegu egoeraren ardura gazteei, ikastetxeei eta, are gutxiago, haurrei leporatu, helduok etxean, lanean, kalean eta aisian gaztelaniaz jo eta su ari garen bitartean”.
Barne gogoeta horren barruan, norbanakoen konpromisoaz gaindi, hainbat esparrutan eragin behar dela uste du EH Bilduk, merkataritzan, administrazioan, lan munduan, kulturan eta aisian esaterako: “Herri mailako elkar hartze bat behar dugu plan baten bidez euskarari bultzada emateko”.
Udalari ere zuzendu zaio koalizioa. Euskararen herriko ezagutzaren araberako (herritarren %60 euskalduna da, eta beste %20 ia euskalduna) politikak behar direla esan du, “gaztelaniaren makulurik gabe ibili behar du aske euskarak gure herrian”. Zentzu horretan, elkarlanerako prest daudela adierazi dute, “garbi dugu herritar guztiak kontuan izango dituen Lezo euskalduna nahi dugula”.
