Garai berriekin lotutako marka berria izango du merkatuak aurrerantzean
'Sasoian sasoikoa - Con mucho gusto'. da eslogan berria. Gaurkotzea eta egungo egoerara egokitzea nahi izan dute merkatariek, nortasuna eta historia alde batera utzi gabe.
Merkatuko, Errenkoaldeko eta udal ordezkariak. Errenteria-Oreretako merkatua udalerriko merkataritzaren bihotza da herritarrentzat eta erreferente askorentzat. Egungo merkatua Niessen merkataritza zentroan dago, eta honakoa du hirugarren belaunaldia, oraingoak bi aurrekari izan baitzituen: azoka zaharra eta gaur egun Merkatuzar dena.
Gaur egun une aldakor batean murgilduta gaude, eta garai berrietara egokitzeko, merkatuaren markaren diseinua aldatzeko beharra ikusi zutela azaldu du Maixabel Alfonso merkatariak. Alfonsok azaldu du “gaurkotzea eta egungo egoerara egokitzea islatzea” nahi zutela, baita euren “nortasuna eta historian zehar definitu gaituzten eta oraindik ere definitzen jarraitzen gaituzten balioak ere”.
Alfonsoren hitzetan, merkatuko merkatariek “janari ona defendatzen” dute, “sasoiko elikadura eta mimoz hautatutako produktuen” aldeko apustua egiten dutelarik. Horrez gain, pertsona guztiak gonbidatu nahi dituzte “sasoiko zaporeak eta sukaldaritza berraurkitzera”.
Ideia horietatik sortu zuten merkatariek marka berria: Sasoian sasoikoa – Con mucho gusto. Eslogan horrekin merkatariak “eroso eta identifikatuak” sentitzen direla baietsi du Alfonsok, eta “oso pozik” daude “herritar guztiei erakusteagatik eta haiekin partekatzeagatik”.
Maika Martin Errenkoaldeko presidenteak ere balioan jarri nahi izan du merkatuaren markaren eraldaketa: “Garrantzitsua da Errenteria-Oreretarentzat erreferenteko merkatu bat izatea. Denbora generamatzan merkatua sustatze bidean, eta modernizatzea beharrezko ikusten genuen. Errenkoaldetik merkatuaren iniziatibak bultzatzen ditugu eta are eta gehiago orain denak elkarte berean gaudela. Uste dugu iniziatiba hauek elkartzearen emaitza direla, eta denoi motorrari indar handiagoz eragitea ahalbidetuko digula”.
Udala, bidelagun
Errenteriako Udala bidelagun izan dute merkatariek prozesuan, eta Aizpea Otaegi alkateak merkatuak herrian duen garrantziari egin dio erreferentzia: “Herriaren bizigarritasunaren parte garrantzitsua eta ezinbestekoa dira gure merkataritza eta ostalaritza. Merkatuak gure komertzioa dinamizatzen du, eta ezinbestekoa da beraien ondoan egotea, pieza garrantzitsua direlako. Berrikuntzekin eta balioekin lotutako merkataritza bat dugu, gogoa eta nahia duena bezeroari etengabe onena eskaintzeko. Guk prozesu hori lagundu behar dugu, horretarako gaude, eta guretzako garrantzitsua da gure artean dugun elkarlan markoa”.
Horrez gain, jakina da udalerrian Touring Kirol Elkarteak mendeurrena ospatuko duela datorren urtean. Klubak elastiko berriak sortuko ditu urteurren berezi horretarako, eta merkatariek ere elastiko horietan euren txokoa izango dutela aurreratu du Otaegik: “Touringek mendeurrena ospatzeko kamiseta berezi bat diseinatuko du. Elastiko horretara merkatuaren logoa inkorporatuko dugu, iruditzen zaigulako bi elementu identitario direla bai Touring eta baita merkatua ere. Elkarri asko eman diezaioketela uste dugu”.
