Haurren ahotsa ere jaietan entzun dadin
Aurten ere, Madalen Jaiek haurrei zuzendutako egitaraua izango dute. 2015. urtetik, gainera, haurrek prestatzen dute egitaraua, «bidelagun» batzuen laguntzarekin. Jaietan sartzen lehenak izango dira.
Haurrek euren pregoia prestatu dute aurten ere. Nora Barroso Moreno eta Naroa Otamendi Diaz dira haurren bidelagun horietako bi, eta argi dute zein izan zen Haurren Jai Batzordea sortzearen abiapuntua: «Haurrek hitza ematea eskatzen ziguten». Ordutik hona, hainbat ekintza antolatu dituzte: ferietara etortzen diren familien haurrekin elkartu, abesti bat, dantza bat eta, noski, txupinazoa. Urtez urte, txupinazoa «eraikitzen» joan dira, prozesuan zehar atera diren gauzak txertatzen joan direlako. Haurrek hasiko dituzte madalenak, osteguneko 18:15ean, Mila Koloreko Txupinazoarekin.
Batzordekideek aitortu dute «beti» hartzen dutela sorpresa haurren proposamenekin, eta euren mugak «guztiz apurtu» izan dituztela: «Bat-batekotasun horretan helduok bizitzen jakin behar dugu. Hori da, azken finean, beraiei ahotsa ematea». Jartzen dieten baldintza bakarra «egingarria izatea» da.
Hortik sortu zen, esaterako, Batuburrunba: «Zarata egitea eskatzen ziguten, entzunak izatea. Orduan, bururatu zitzaigun umeek etxetik sortutako instrumentuak ekartzea, eta ZoZongorekin batera txupinazoaren aurretik 45 minutuko kalejira egitea».
Haurren txupinazoa 18:00etan izango da, Koldo Mitxelena plazan. Batuburrunba, berriz, 17:15ean irtengo da Zumarditik. Horrez gain, apar festa, eskulan tailerrak eta antzerki bat ere antolatu dituzte madalenetako beste egun batzuetarako.
Egingarritasunaren muga horretan, baina, ez zaizkie etorkizunerako ideiak falta: «Beraien bazkaria nahi dute, baina oraindik ez dugu antolatzea lortu». Horrez gain, buruhandi eta erraldoi tailerra ere eskatu dutela aipatu dute batzordekideek, baina egitarauan txertatzea ezinezkoa zenez, urtean zehar egingo dute.
Herritarrei gonbita luzatu diete Haurren Jai Batzordeko kideek: «Haurrak etorkizuna dira, eta merezi du beraiek entzutea. Denok disfrutatzeko tokia dago».
