Muguruza eta txistulariak, hibridaziorako prest
Klasiko bilakatu da dagoeneko Madalen Aurreko Txistularien Kontzertua. Fermin Muguruza izango da aurtengo gonbidatua, eta irundarraren ibilbide oparoa errepasatu eta omenduko dute hilaren 20an, Zumardian.
Kortatu taldeak 1984ko uztailaren 19an egin zuen bere lehen agerraldia, urte hartako Errenteria-Oreretako Madalen Jaien atarikoetan, goizaldeko 06:30ean. Programaz kanpo eta sorpresaz, Patxikuko kanpan RIP eta Regimen taldeekin partekatu zuen oholtza. Muguruzarren taldeak lau urteko ibilbide bizia izan zuen harrezkero, eta 1988. urtean banatzea erabaki bazuten ere, ez zen izan geldirik egoteko, Negu Gorriak eratu baitzuten 1990an. Arrakastaz arrakasta, iraungitze data izan zuen talde horrek ere, eta jarraian, Fermin Muguruzak Dut taldearekin Ireki ateak diskoa kaleratu zuten. Ondoren, Muguruzak musikan ez ezik zineman ere bide luzea egiten aritu da.
Madalen Jaiak berriz ere bueltan dira. Hilaren 20an, XV. Madalen Aurreko Txistulari Kontzertua egingo dute Zumardian, 20:00etan, gonbidatua Fermin Muguruza izango delarik. Urtero Euskal Herrian musikan ibilbide oparoa duen musikariren bat gonbidatzen du Udal Txistulari Taldeak emanaldi berezi horretara —2019koa Niko Etxart izan zen— eta txistuaren doinuetara eginda ez dauden artista gonbidatuen abestiak egokitu eta plazaratzen dituzte. Xabier Vesga Elizalde Udal Txistulari Taldeko zuzendariak adierazi du Muguruzaren ibilbidea markatu duten abestiak aukeratu dituztela emanaldirako. Egokitzapen horiekin lan handia izan dutela nabarmendu du.
Kontzertu berezia izango dela ziur da Vesga. Oholtza partekatuko dute Euskal Herriko 50 txistularik, Zaria Koru Abesbatzak, eta metal boskote batek. Elkartze hori Euskal Herriko Txistularien Elkarteak egin duela posible adierazi du Vesgak, eta laguntzaile izan dituzten denei eskerrak eman dizkie
