Elizalde eta Gurutze lotuko dituen bidegorria eraikitzen hasiko dira
Udalak sei hilabeteko lanak abiatuko ditu datozen egunotan, eta amaitzean zortzi auzoak lotuta egongo dira.
Gurutze eta Elizalde lotuko dituen bidegorria eraiktzen hasiko da udala. Datozen egunetan, Oiartzungo Udalak Gurutze eta Elizalde auzoen arteko bidegorria eraikitzeko lanak abiatuko ditu. Bide berria Gurutzeko aparkalekutik abiatu, Malkorra hotelaren atzealdetik Fraileen Bideraino joango da eta hortik Legarre kalera. Bide guztia argiztatuko du Udalak eta toki batzuetan egurrezko barandak ere jarriko ditu. Udalaren arabera, bide berriak malda txikiagoa izateaz gain, ibilbide seguruagoa eskainiko die herritarrei.
Lehenengo aurreikuspenen arabera, lan hauek sei hilabete iraungo dute. Udalak adierazi duenaren arabera, Eusko Jaurlaritzaren diru laguntza eskuratu dute lan hauetarako, eta orotara 635.000 euroko aurrekontua izango dute. Mugikortasun eredu iraunkorra sustatzea da Oiartzungo Udalaren helburua, eta proiektu hau amaitzean, Oiartzungo zortzi auzoak bidegorriak lotuko dituela adierazi du.
