[Argazki galeria] Madalen Aurreko Txistularien Kontzertua, festen bezpera (eta sorpresa bat)
Fermin Muguruza izan da aurtengo gonbidatua. Muguruzaren ibilbidea markatu duten abestiak jo dituzte, Udal Txistulari Taldeak lagunduta.
Fermin Muguruza izan da aurtengo omendua. Gaur, uztailaren 20an, XV. Madalen Aurreko Txistulari Kontzertua egin dute Zumardian, 20:00etan hasita. Urtero, Euskal Herrian musikan ibilbide oparoa duen musikari bat gonbidatzen du Udal Txistulari Taldeak emanaldi berezi horretara —2019koa Niko Etxart izan zen—, eta, oraingo honetan, Fermin Muguruza izan da artista gonbidatua. Txistuaren doinuetara eginda ez dauden artista gonbidatuaren abestiak egokitu eta taularatu dituzte. Zaria Koru Eskolako kideak izan dituzte lagun. Bete-bete zegoen zumardia, giro handiarekin.
Aurten, Muguruzaren ibilbidea markatu duten abestiak jo dituzte: Black is Beltza; Sarri, Sarri; Bertso hop edo Gora Herria; esaterako. Azken bi kanta horietan Jon Maiak lagundu dio oholtzan. Eta sorpresa bat izan da: une batez, Iñaki Pikabea Piti agertu da oholtzan; hark eta Joseba Sarrionandia Sarri-k inspiratu zuten Fermin Muguruza buru zuen Kortatu taldea Sarri, Sarri kantua egitera, 1985eko sanferminetan. Arratsaldeko une gorena izan da hori. Xanti eta Maialen erraldoiak ere erotu dira Sarri, Sarri dantzatzen. Festa handia, biharkoaren aurrekari ederra.
Jendea festarako gogoz dagoela argi ikusi da, Zumardia leporaino bete baita. Bihartik aurrera, jaietan murgilduko da herri osoa, 1.090 egun geroago.
Jarraian, kontzertuko argazki batzuk ikusgai:
