Altzaten egin den murala estali dutela salatu dute
Altzateko obren egungo egoeraren inguruan informatzeko helburua zuela azaldu dute. Gaur goizean estalia azaldu da.
Altzateko eremuan margotu zuten murala. Gaur goizean estalia azaldu da. Altzateko eremuan egiten ari diren proiektua salatzeko eta haren inguruko informazioa emateko, Iztietako Gurekin Auzo Elkarteak eta Altzate Herriarentzat plataformak mural bat margotu zuten elkarlanean. Mural hori Oiartzun ibaiko hormaren aldean margotu zuten, asteartean, hilak 19, bukatu zelarik. Gaur, baina, mural hori estalia azaldu da, eta Gurekin Auzo Elkarteko Txelis Martin presidenteak elkartearen “haserrea” plazaratu du. Martinek azaldu du atzo gauean ohera sartu zenean murala bertan zela, baina gaur goizean esnatu denean, murala estalia zegoela. Martinek salatu du momentuz ez dakitela nor dagoen estalketaren atzean, baina nor izan den jakitea gustatuko litzaiekeela.
Mural hori sortzean, herritarrak Altzateko obren inguruan “informatu” nahi izan dituztela azaldu du Martinek, “jende askok ez baitaki egoera zertan den”. Martinek adierazi du obren egungo egoera eta baimenen inguruko informazioa jasotzea “asko kostatu” zaiela, baina azkenean Espainiako Gobernuko Kostetako Zuzendaritza Nagusitik idazki ofizial bat jaso zutela, zeinak dioen “Altzateko proiektua bitan ukatu” dela, eta egoera hori “jendeak jakin beharko” lukeela. Horrez gain, “onartua ez dagoen proiektu baten etxebizitzak saltzen” ari direla salatu du auzo elkarteko presidenteak.
Martinek baietsi du esan zitzaiela 2021eko maiatzean hasiko zirela eraikitzen, baina egun beste eginbeharretan ari direla nabarmendu du: “Gaur egun ikusi dezakegu nola dagoen egoera. Hilabete horietan guztietan kontaminazioaren usaina jasan dugu, lurraren mugimenduak azaleratu duena. Jendeari nolabait informazioa helarazi behar genion, bestela ez litzatekeelako ohartuko. Herritarrek ez dakite proiektua onartu gabe dagoenik. Oraindik ez da deskontaminazioa egin, eta momentu honetan deskontaminazioa egiteko saiakera pilotu bat egiten ari dira nola garbitu daitekeen jakiteko”.
