ETE Ligaren ikuskizuna, larunbatean Oiartzun ibaian
Emakumeen ligako zortzigarren estropada jasoko du herriak, madalenen testuinguruan. Hibaikako antolatzaileek festa bikoiztu nahi dute.
Hibaikaren trainerua, Pasaiako badian, Hernaniren banderan lehian. Argazkia: Josu Z. Oiartzun ibaiak jasoko du Emakumeen Traineru Elkartearen (ETE) Ligaren zortzigarren estropada. Larunbatean da, 13:15ean hasita. Hibaika Arraun Elkarteak antolatuta, liga horretako bederatzi ontziek parte hartuko dute bertan, erlojupeko modalitatean. Errenteria Hiria Emakumeen IV. Ikurrina erabakiorra izan daiteke liga horretako lehen postuak finkatzen joateko: oraingoz, Hondarribia da lehena, eta Hibaika bigarrena. Beraz, bi traineruak hurrengo sasoian EuskoTren Ligara igotzeko postuetan daude. Madalenetan izango dira Errenteria-Oreretan, beraz, Hibaikak festarako beste arrazoi bat eman nahiko du etxeko bandera irabaziz.
Irteera Hibaikaren egoitzaren inguruan, Ondartxon, izango dute ontziek. Handik portu aldera joango dira traineruak, han, Lezoko kaian, ziaboga emateko. Handik bueltan berriz ere Oiartzun ibaian sartuko dira partaideak, Panier inguruko helmugara iristeraino. 2.780 metroko ibilbidea egingo dute bederatzi lehiakideek, esan bezala, ziaboga batekin.
Erlojupekoa denez, banaka aterako dira ontziak. Bi multzotan banatu dituzte, ETE Ligaren sailkapenaren arabera. Hortaz, lehenak ateratzen (13:15) Portugalete, Castro, Hernani eta Zarautz izango dira, minutueroko tartearekin. Haiek bukatuta hasiko dira bigarren taldekoak irteten: Ondarroa, Zumaia, Deustu, Hibaika eta Hondarribia.
ETE Ligako lehena da Hondarribia, 57 punturekin. Bigarrena da herriko taldea, Hibaika, 55ekin. Biak bide onean doaz sasoiko helburu nagusia lortzeko zereginean, bi lehenek irabaziko baitute hurrengo urtean emakumeen liga gorenean, EuskoTren Ligan, aritzeko eskubidea. Baina Madalen ontzikoak saiatuko dira hondarribiarrak gainditzen, sailkapen nagusi horretan duten tartea murrizteko.
