Pasaiako XXXVII. Banderaren agertoki izango da badia larunbatean
KAE2 eta KAE1 ligetako arraunlariak erlojupekoan arituko dira asteburuan. Oarso-Bidasoko bost ordezkari uretaratuko dira orotara.
Atzo egin zuten estropadaren aurkezpena, Pasaiako udaletxean. 
Martxa hasita dago aurtengo arraun sasoia, eta horren erakusle, joan berri den nahiz heltzear den asteburua. Badia izango da arraunzaleen agendan; izan ere, datorren asteburua, lanpetua ez ezik, berezia ere izango da Pasaiako arraunlarientzat, Pasaiako XXXVII. Bandera lortzeko uretaratuko baitira larunbatean KAE-ko gizonak.
17:00etan hasiko dira arraunean KAE2koak, eta 50 minutu geroago, ur berdinean, KAE1ekoak. Lehenengo arituko den kategorian 9 partaide egongo dira, bi txandatan; artean, Trintxerpe eta Hibaika izango dira eskualdeko ordezkari.
KAEko kategoria gorenean, aldiz, 12 traineruk hartuko dute parte, bi txandatan ere. Azken horretan aterako dira, hain zuzen, Oarsoaldeko ordezkari pasaitarrak: San Pedro eta San Juan. Horiekin batera Hondarribiaren B ontzia izango da lehian.
KAE1eko azken estropadan, Orioko joan den igandekoan, San Pedrok eraman zuen trapua Kalparra aldera, eta moreengandik segundo eskasera bigarren izan zen arrosen Erreka.
Erlojupekoak
Bi ligetako badiako estropadetan erlojupekoan arituko dira, kale bakarrean, eta bost luze eta lau ziaboga egin beharko dituzte estropada osatzeko.
Asteazkenean egin zuten estropadaren aurkezpena arduradunek [argazkian] Pasaiako udaletxean. Eskertuta agertu zen Izaskun Gomez alkatea Illunbe Arraun Elkarte antolatzailearekin. Bi aldeek adierazi zuten hurrengo urtean emakumeen estropada ere antolatu ahal izateko nahia.
