[Elkarrizketa] «Gauza berriak egiteko gune bat izatea nahi dut, ilusioa piztuko duena»
Pasaitarra izango da esperimentazio gune berriaren zuzendaria. Onartu du «erronka handi» bat izango duela parez-pare, baina gogotsu da. Zentroaren xehetasunak eta Errenterian kokatzearen argudioak plazaratu ditu.
[Badalaben gaineko erreportajea ikusteko, sakatu hemen]
Zu zeu zara proiektuko zuzendaria. Zer suposatzen du horrek zuretzako?
Egia esan erronka handia da niretzako. Egiten dakidan horretatik atera behar dut etengabe; baina, aldi berean, izugarria izaten ari da dena. Joan den osteguneko aurkezpenean nire burua 80 pertsonaren aurrean hitz egiten ikustea sekulakoa bat izan zen, jendeak esan zidan ez ninduela errekonozitzen.
Badalab erreferentziazko gune bihurtzeaz ari zarete. Zergatik?
Geure buruari erronka handi bat jartzeko bokaziotik dator ideia hori, gure ezaugarriak dituen zentrorik ez baitugu topatu mundu guztian. Ez dago hizkuntza gutxituen biziberritzean esperimentazioa sustatu nahi duen espaziorik. Bilatu dugu, baina ez dago. Gure kasuan, gainera, benetan uste dugu etorkizuneko egoera konplexuari erantzun berriak topatzeko badaukagula ekarpena egitea. Baina erreferente bilakatzearen ideia gehienbat gure burua probokatzeko eta erronka anbiziotsu bat jartzeko izan da.
Hizkuntza gutxituen biziberritzean eragin nahi duzue, beraz.
Hala da. Munduan dauden hizkuntzen ehuneko oso handi bat desagertzeko zorian dago. Orain arte, hizkuntza gutxitu baten adibideetako bat euskara izan da; baina gaur egun hizkuntza txikiak kontsidera daitezkeenak, esaterako, suediera, finlandiera edo poloniera, garai digital honetan ere desagertzeko arriskuan daude. Hori dela eta, ez da hainbeste herri txiki edo hizkuntza txiki gutxituen afera, bada lurralde edo hizkuntza gehiagori eragiten diena ere.
Errenteria-Oreretakoa da Badalabek ezarri duen gune bakarra. Zergatik hemen?
Arrazoi ezberdinak egon dira Badalab Errenteria-Oreretan kokatzeko. Alde batetik, argi genuen euskararekin lotutako laborategi bat ez genuela ohiko arnasgune edo herri txiki batean kokatzerik nahi, estereotipo horrekin hautsi nahi genuen. Nolabait euskara eremu urbanoetan kokatu nahi dugu. Bestetik, zentroa Donostian ezartzeko tentazioa izan genuen, baina dena Donostiara eramaten badugu, non geratzen da lurralde oreka hori?
Bide horretan, Errenteria-Oreretaren aukera atera zen elkarrizketetan, eta egia esan oso aukera egokia eta aproposa iruditzen zaigu herri honetan gauza asko gertatzen ari direlako. Guk Errenteria-Oreretari ekarpena egin diezaiokegu, baina udalerriak Badalabi ere ekarpena egin diezaiokeela ziur gara, Errenteriako Udalak eta herriko eragileek oso erantzun ona izan baitute proiektuarekiko.
Zer suposatuko du Errenteria-Oreretarentzat Badalab herrian egoteak?
Errenteria-Oreretatik harago ere, nahi dudana da Badalab gauza berriak egiteko gune bat izatea, ilusioa piztuko duena. Gauza on asko egiten ari gara, eta ideia eta proiektu berriak egiteko espazioa bihurtzea nahi dut. Horrez gain, aniztasunean eragile eta erreferente izan nahi duen komunitate horretan, uste dut ekosistema oso aberatsa osa dezakegula aniztasunaren kontzeptutik tira egiten badugu.
