[Bideoa eta galeria] Xabin Laboari eta Nekane Puyri aitortza
Santio Jaien aurrekari bezala, Aitona-Amonen aterpeak omenaldia egin die gaur eguerdian Xabin Laboari eta Nekane Puyri.
Gaur, Donibaneko Santio Jaien atariko bezala, Aitona-Amonen Aterpeak omenaldia egin die Xabin Laboa eta Nekane Puy sanjuandarrei. “Pertsona onak dira. Ez dute zalantzarik izan beren denbora librea eta beharrak sakrifikatzeko besteei laguntzeagatik, gutaz ahaztu gabe”; horiek Jaione alabaren hitzak dira, gaurko aitortza ekitaldian Donibaneko jubilatuen elkarteko kideek irakurri dituztenak. Merezitako omenaldia izan da, alabak esan moduan, beti izan direlako zutena emateko prest, etxekoak zainduz, baina herritarrak erdigunean izanda. “Senideak oso harro gaude zuetaz. Ez da gutxiagorako!”.
Xumea eta zaindua izan da gaurko ekitaldia. Xabinekin eta Nekanerekin batera haien senideak izan dira. Haien bizitzaren nondik-norakoak azaldu dituzte erretiratuen elkarteko kideek, eta zapia eta aginte makila eman ondoren, Lintxua Dantza Taldeko kideek ohorezko Agurra eskaini diete. Gero, harro igo dute Aitona-Amonen Elkartearen gorenera bandera. Emozionatuta zeuden. Hamaiketakorako tartea iritsi da segidan.
Aitona-Amonen elkarteko kideek irakurri duten azalpenean esan dute ezinegon handi batek markatu duela bi sanjuandarren bizitza, “besteei laguntzea. Zuen ametsa zen misioren batera joatea, gehien behar zutenei laguntzeko”. Misioan Venezuelara joan ziren, jada bi seme-alaba zituztela. Han jaio zen hirugarrena, alaba. Bost urtez Latinoamerikako estatu horretan laguntza ematen izan ostean, jada herrira bueltan, Laboa bere lantokira, Luzuriaga ontziolara itzuli zen, eta Puyk jarraitu zuen familiaren zainketarekin. Aldi berean, Laboak, herriko neska-mutilei gau eskoletan marrazketa, mekanika edo bestelakoak irakastez zizkien, etorkizun hobea izan zezaten.
Jada bost seme-alabarekin, herriko elizan katekista zeregina bere egin zuten, eta aldi berean, Puyk Elizako Abesbatzan aritzeko tartea hartu zuen, Laboak Konstantzia Bandan egin bezala. “Zuen historia polita ezagutu ondoren, omenaldi hau zuen familia osoarekin partekatu nahi dugu, eta gure errespetu osoa eskaini nahi dizuegu”, esan dute erretiratuen egoitzako ordezkariek.
Jarraian, gaurko ekitaldiaren hainbat irudi, eta bideoa:
