Zaintzadi, adinekoen bakardaderako traba
Bi urtez luzatuko dute proiektua. Helburua, arrazoi ezberdinengatik bakartu diren pertsona helduei irtenbidea bilatzea da.
Olaia Lasai Ongizate zinegotzia, erdian, Aintzane Iribar eta Garazi Solís Zaintzadi proiektuko dinamizatzaileekin. Oiartzungo Udala. Oiartzungo Udalak Zaintzadi proiektua aurkeztu du, bakardadea eta isolamendua bizi duten pertsona helduen zaintza komunitarioa bermatzeko. Helburua baliabide gutxi dituzten eta hurbileko senide edo inguruko pertsonen laguntza jasotzen ez duten 55 urtetik gorako pertsonei arreta berezia eskaintzea da, horien behar sozial eta psikologikoei erantzuteko, hain zuzen ere. Zaintzadi bidez, plan pertsonalizatu nahiz progresiboak egingo dira; besteak beste komunitateko gainontzeko kideekin harremana sustatuz, herriko baliabide eta zerbitzuen inguruko informazioa eskainiz, edo berauetan parte hartzera animatuz.
Proiektuak mahaigaineratu duen berrikuntza nagusienetako bat udalaren eta herritarren elkarlana bultzatuz, babesgabetasun egoerei aurre hartzeko sistema da. Izan ere, herriko eragile eta norbanakoen parte-hartzea beharrezkoa izango da zaintza sareak sortu eta bakardade egoera hauek detektatu eta lantzeko. Hala, “auzozain” herritarren zereginak bi izango dira, nagusiki: batetik, proiektuan parte hartzen direnengan edo parte-hartzaile potentzialengan ez-ohiko zerbait detektatu, eta hala bada, Ongizate Saila ohartaraztea; eta bestetik, parte hartzaileei egunero elkarrekin jarduera ezberdinak egiteko aukera luzatzea.
Olaia Lasa Ongizate zinegotziak honela laburbildu du bi urtez luzatuko duten egitasmoa: “martxan jartzera goazen proiektu hau aurrerapauso garrantzitsua da: Udala eta herriaren artean elkar zaintzeko egitasmoa, guztion ardura baita herritarron ongizatea”. Era berean, nahia, zaintzaren aldekoa da: “ekosistema sare publiko-komunitarioko bolondres taldea sortu, egonkortu eta dinamizatzea da gure apustua, elkarrekin aurrera egingo duen herria sortzeko”.
Proiektuaren nondik norako guztien (luzapena, garapen faseak, aurrekontuak, etab.) berri izan daiteke Oiartzungo Udalaren dokumentu honetan.
