Udala: "Eskailera mekanikoen geldialdiak erabiltzaileek eragiten dituzte"
Gran Sol, Pablo-Enea eta Kanpitxuko eskaileren etengabeko arazoak "erabilera txarragatik, utzikeriagatik edo nahita" direla esan du udalak.
Lau eskailerek lotzen dituzte Gran Sol, Pablo-Enea eta Kanpitxo. 
Gran Sol, Pablo-Enea eta Kanpitxu inguruetako bizilagunak manifestatzen hasiak dira, Trintxerpe eta San Pedro goialdeetako kale horien lotura egiten duten eskailera mekanikoak etengabe gelditu edo matxuratzen baitira aspaldi, ageriko arrazoirik gabe. Egoera hori izanik, zenbait azalpen eman ditu udal gobernuak.
Arduradun politikoen arabera, mantentze lanetako enpresako teknikariek txosten bat egin dute gertatzen ari denaren berri izateko, eta dokumentu horretan 36 anomalia jaso dituzte lau eskailera ataletan, “gehienak, erabilera okerrak eragindakoak”. Hori esanda, “gizalegearen aldeko deia” egin du udalak, eta kalteak nahita eragiten dituztenak salatzeko eskatu die bizilagunei.
Ulerkor agertu dira eskailera mekanikoen geldialdiek bizilagunen mugikortasuna zaildu egiten dutela aitortzean. Orain arteko intzidentziei buruzko azalpenak emateko, esan dute geldialdi gehienak matxura txikiengatik gertatu direla, baina baita “eskaileren erabilera okerra egiteagatik edo utzikeriagatik, eta zenbaitetan nahita egindako ekintzengatik”.
Teknikariek esan dutenez, geldialdi horiek eskailerak egunero erabiltzen dituzten erabiltzaileek eragiten dituzte, jaistean stop botoia sakatzen dutelako, “eta horren ondorioz, eskailera ez da berriro martxan jartzen, eta teknikoak etorri behar izaten du berriro abiarazteko”. Arazoa konpontzeko sentsore batzuk aldatu behar izaten dira.
Udaletik esan dutenaren arabera, sentsore horiek instalatzeko konponketak 8.198 euroko aurrekontua du eskailera-atal bakoitzerako, eta dagoeneko agindua eman dute “lehenbailehen konpontzeko”.
Hausnartzeko deia egin dute halaber: “Ekipamendu publikoak gaizki erabiltzeak pasaitar guztiei egiten die kalte, eta erabiltzaileei beharrezko zerbitzu bat kentzen zaie eta galera ekonomikoa eragiten dute, eta, ondorioz, aurre egin behar da herritarrek eurek jarritako funts eta baliabide publikoak erabiliz”.
Hori esanda, berriro eskatu dute, kalteak nahita eragiten dituztenak Pasaiako Udaltzaingoan salatzeko.
