Launaka lortu ditu Pasaia Kayakek asteburuko emaitzarik onenak
Gazte Promesen Espainiako Txapelketan lorpenik handiena lau neskek lortu dute: Maialen Vitoria, Irati Herce, Noa Revuelta eta Enara Nuñezek.
Joan den asteburu osoa hartu zuen olinpiar erako abiadurako Gazte Promesen Espainiako Txapelketak, Verducidon (Pontevedra). K-1, K-2 eta K-4 modalitateetan, 500 eta 1.000 metroko distantziak bete behar izan zituzten palistek, eta bertan izan ziren Pasaia Kayakekoak.
Haur eta kadete kategorietako Espainia osoko kirolari onenak bildu zituen txapelketak, ur lasaietako piraguismoak duen modalitate olinpiko bakarra baita abiadura, eta horretara bideratzen dituzte talde guztiek beren kirolari onenak, zenbateraino molda daitezkeen ikusteko.
27 ontzi sailkatzen dira orotara, eta horiek zeintzuk izango diren erabakitzeko kanporaketak lehiatu behar dituzte lehenik kirolariek. Horien artean hiru finalerdi atera ohi dira: lehen 3 ontziek A finala osatzen dute, 3 ondorengoek B finala, eta hurrengo 3ek C finala. Probaren maila kontuan izanda, finalerdietara sailkatze hutsa “merituko emaitza” dela aitortu du Txema Yarza pasaitarren eledunak.
Banaka
Zailena izan ohi da beti banakako lehia, eta bertan eman zuten aurpegia, Haurren A eta B kategorietan, Gaizka Lopez eta Oinatz Alonso pasaitarrek, hurrenez hurren. B finalera sailkatu ziren biak ala biak, eta Lopezek laugarren egin zuen berean eta Alonsok zazpigarren, lan oso txukuna burutuz.
Binaka
Aipatzekoa, halaber, neska kadeteen lana K-2 ontzietan. Maialen Vitoriak eta Irati Hercek osatutako ontzi pasaitarra zen taldearen apustu garbiena, eta hori berretsi zuten, finalerdian B finalera sailkatzea lortu baitzuten, gerora bederatzigarren egiteko. Noa Revueltak eta Enara Nuñezek osatutako ontzia, aldiz, zortzigarrena izan zen C finalean.
Launaka
Baina, K-2 ontzietan baino, K-4 ontzian eman zuten lau neska pasaitar horiek [argazkian] beren mailarik onena, eta lortu zuten taldearen emaitza distiratsuena: zuzenean jokatu zuten finalerdia, eta emozioz beteriko lehian hirugarren tokia eta A finalerako azken txartela lortu zuten, 500 metroko ibilbidean. Pasaitarren aurretik sailkatu zen ontziak segundo pasatxo besterik ez zien atera.
Finalean, azkenik, pilaturiko nekeak neke, zazpigarren izan ziren pasaitarrak, Santiagotarrak eta Nautic San Antoni taldeko ontziekin lehia gogorrean seigarren postua lortzeko. Pasaitarrak ondo moldatu dira beste behin ere Galizian, eta itsasoko probek hartuko dute orain txanda taldearen egutegian. Marea Urdinak ez du etenik.
