Herriaren sostengu direnak omendu dituzte Xanistebanen atarian
Jaiak iragartzeko ekitaldia egin du Oiartzungo Udalak Arizmendienean. Zaintzaileen nahiz auzoetako jai batzordeen lana aintzatetsi dute.
Leporaino bete zuten oiartzuarrek Arizmendienea lorategia atzoko ekitaldian. 
Xanistebanak iragartzeko ekitaldia egin zuen Oiartzungo Udalak atzo, Arizmendienea lorategian. Zaintzaileei aitortza egin zieten bertan udal arduradunek, eta auzoetako festa batzordeetan parte hartu dutenei eskerroneko hitzak zuzentzeko ere hartu zuten tartea. Gogotsu daude bizilagunak gaur abiada hartuko duten jaiak ospatzeko, lepo baitzegoen lorategia atzoko aurkezpenean.
Jexux Leonet alkateak eman zien ongietorria bertaraturikoei. Urtekaria eta Mugarri liburua idazten parte hartu duten lagunak zoriondu zituen jarraian, “egindako lan bikainagatik”, liburu horiek “gure ondarearen erakusle eta parte” ere badirela uste baitu eledunak.
Hori eginda, aintzatespen hitz gehiago:
Zaintzaileak
Atzoko bilkuran aintzatespen berezia egin nahi izan zioten udaletik zaintzari eta, nagusiki, horretan dihardutenei. “Tradizionalki eta oraindik ere, zaintza feminizatutako lana da, aitortu gabea eta gutxietsia”, esan zuen Iosune Cousillas Kultur zinegotziak: “Pertsona zaurgarriak gara. Bizitza osoan zehar zainduta egon behar dugu, baina gaur egun zaintza lanek ez dute zaintzailearentzat eskubide nahikorik sortzen, soldata arrakala eta menpekotasun ekonomikoa sortzen dute”.
Udalburuak, bere partetik, konpromisoa hartu zuen, dagokion kargutik, zaintzak duen garrantzia azaleratu eta sektore horretan jarduten duten pertsonen egoera eta baldintzak hobetzen jarraitzeko.
Auzoetako jai batzordeak
Urte luzez auzoko festen nahiz Xanistebanen antolakuntzan lanean aritu izan diren horiek ere omendu zituzten atzo. Jon del Olmo Ogasun zinegotziak hartu zuen hitza orduan, eta eskerrak eman zizkien bizilagun horiei “hain herri aberatsa” sortzeko egindako lanagatik. Oiartzun herri “bizia eta sortzailea” dela esan zuen arduradunak, eta hori horrela bada, “auzoz auzo, isil-isilik, urte luzez” lan egin duten horiei esker da.
Auzoko jai batzorde bakoitzetik kide bat igo zen oholtzara, eta oroigarri bana eman zien alkateak, “herria kolorez betetzeagatik”. Lanean jarraitzeko deia egin zien Cousillasek: “Elkarlanean, herritarrak eta udala batera, koloretako Oiartzun eraikitzen jarraitzeko”.
Honakoak izan ziren auzoetako oroigarria jaso zutenak:
- Altzibar. Puri Ojedas Tadeo.
- Arragua. Eustaki Azpiroz Pikabea.
- Elizalde. Bibiano Arbelaitz Tapia eta Maite Gezala Legorburu.
- Ergoien. Pier Elizondo Oiartzabal.
- Gurutze. Sebastian Galardi Aduriz.
- Iturriotz. Mari Jose Arana Aranburu.
- Karrika. Pili Arbelaitz Mitxelena.
- Ugaldetxo. Ixiar Iñarra Oiartzabal.
Ekitaldiari bukaera emateko, Olarri dantza taldeko kideek ohorezko kontrapasa dantzatu zieten omendutakoei, eta Xanistebanetako kartel lehiaketako sarituei ere.
