Etenik gabeko kontzertuak eskainiko ditu 2022ko Kilometro Lezok
Egun handia irailaren 3koa izango bada ere, hilaren 19an abiatuko da kultur jaialdiaren egitaraua, eta hiru asteburu hartuko ditu orotara.
![](https://oarsoaldea.hitza.eus/site/files/2022/08/kilometro-lezo.png)
2022ko Kilometro Lezo hilaren 19an abiatuko da, ostiral eta larunbateroko eskaintzarekin, eta irailaren 3an emango dio bukaera musika taldeen erakustaldi erraldoi batek. Egun horretarako, etenik gabeko kontzertuak programatu dituzte. Kultur jaialdiaren hirugarrena izango da aurtengoa, eta Lezoko Udalak ziurtatu du “berritasunez josita” datorrela.
Jesus Mari Martiarena, Lezoko alkatea, Ion Pombar, Kultur zinegotzia eta Xanti Val, Lezoko Udaleko Kultur teknikaria, pozik agertu dira aurtengoa aurkezterakoan. Edizio berezia izango dela esan dute, eta zinegotziak esan du euskal kultura sustatu eta bultzatzeko konpromisoa indartu nahi duela udalak, “eta jaialdia hobetzeko aurrerapausoak eman ditugu”.
Berritasunak
Aurtengo berritasun nagusia musika taldeen erakustaldia izango da. Hamabi kontzertu eskainiko dira irailaren 3an, 16:00etatik 00:00etara bitarte, etenik gabe. Horretarako, bi eszenatoki gaituko dituzte, eta ‘ping-pong’ antzeko estrategia erabiliko da; hau da, kontzertu bat bukatu eta jarraian ondorengoa hasiko da beste aldeko oholtzan.
Emakumeen presentzia lehenetsi nahi izan dute: Liher, La Basu, Noa & the Hell Drinkers edo La La Love You bezalako artista esanguratsuak hartuko ditu Lezok.
Gainera, herriko eta inguruetako artistak ere gonbidatu dituzte aurten; Ilargi Arrizabalaga, esaterako.
Erakustaldiaren iraupena kontuan hartuta eta jaialdia girotzeko, Herri Eskola inguruan pare bat foodtruck (janaria saltzen duten furgonetak) egongo dira aurten. Ogitartekoak eta izozkiak erosteko aukera egongo da, eta txosna bat jartzea ere aurreikusi dute, edaria erosi ahal izateko.
Hori esanda, horra hor 2022ko Kilometro Lezoren programa:
- Hilak 19, ostirala. 20:00etan, Nuvanut (Myriam Perez).
- Hilak 20, larunbata. 20:00etan. Mikra (Berdinki Zirkua).
- Hilak 26, ostirala. 20:00etan, Akabo (Barsanti Teatroa).
- Hilak 27, larunbata. 20:00etan, Maña (Manolo Alcantara).
- Irailak 2, ostirala. 20:00etan, Ay Karmela! (Orratx Antzerki Taldea).
- Irailak 3: Musika Taldeen Erakustaldi erraldoia:
- 16:00. Gotzen, Musika Eskolako Banda.
- 16:20. Ilargi Arrizabalaga.
- 16:40. Caste.
- 17:00. La Basu.
- 18:00. Cliché.
- 18:30. Noa & the Hell Drinkers & friends.
- 19:45. The Fake Cousins.
- 20:15. DJ Rock & roll eta DJ Artie Escolar.
- 20:30. Love 23.
- 20:50. Liher.
- 22:15. DJ Artie Escolar.
- 22:45. La La Love You.
Emanaldi guztiak Herri Eskolako patioan izango dira, aire librean. Doakoak izango dira, baina edukiera kontrolatzeko asmoz, sarrerak aldez aurretik hartu beharko dira ohiko bideen bitartez: kultur bulegoan, udalaren webgunean edota APP- an. Ahal den neurrian, azken bi aukera horiek lehenesteko eskatu dute. Sarrera guztiak datorren ostiraletik aurrera egongo dira eskuragarri.