[Galeria] Bazkari feminista, elkar saretzeko
80 lagun inguru bildu dira eliza ondoko plazan bazkari feministaz gozatzeko.
Feministak elkar saretzen. Baserritar Egunean bazkari feminista antolatu du Oiartzungo Asanblada Feministak. Eguerdian, 14:30ean, 80 lagun inguru bildu dira eliza ondoko plazan bazkari feministaz gozatzeko. Azken egunotako beroaren ondoren, gaur giro ederra izan dute oiartzuarrek. Plazan bertan prestatu duten paella goxoaz eta elkarren konpainiaz gozatu dute.
Aurten gainera asko dute aldarrikatzeko. Xanistebanak duela bi egun hasi ziren eta dagoeneko zazpi eraso salatu dituzte. Asanblada feministak festen atarian egin zuen agerraldian, argi utzi zuten ez dutela eraso bat bera ere onartuko herrian, eta horregatik, indarrak batzen eta saretzen jarraituko dutela. “Emakumeok aske izateko dugun armarik zorrotzena elkar babesteko sareak dira” adierazi dute jai batzordeko kideek. Hori dela-eta kalean jarraituko dute “gauak okupatzen eta jai eredu feministen alde borrokatzen”.
Jaiak elkarrekin ondo pasatzeko eta saretzeko baliatuko dituzte. Elkarrekin jan eta edanaz gozatzen, eta batez ere, askatasunez egiten.
Hona hemen bazkari feministako zenbait argazki:
