Xanistebanetako eraso matxistak irmo arbuiatu dituzte
Hilaren 2tik 3ra bitarteko gauean salaturiko zazpi eraso matxistak gaitzesteko elkarretaratzea deitu zuen atzo Oiartzungo Jai Batzordeak.
Hamarka bizilagunek bat egin zuten deialdiarekin atzo arratsaldean. 
Oiartzungo Jai Batzordeak elkarretaratzea deitu zuen atzo arratsaldean, Xanistebanen lehenengo gauean -hilaren 2tik 3ra- egondako eraso matxistak irmo salatzeko asmoz.
Hamarka bizilagunek bat egin zuten deialdiarekin 20:30ean txoznagunean, aurreko gauean emandako 7 eraso matxisten aurrean -jakinarazitakoak besterik ez dira horiek- gaitzespen guztizkoa adierazteko.
Herriko jaien lehen gauean jazotakoa oso larri iritzita, plazak hartzeko beharretan ikusi zuten euren burua, enegarren aldiz, emakumeek. “Aske izateko dugun armarik zorrotzena emakumeok* elkar babesteko sareak dira”, esan zuten. Eta ozen aski errepikatu zuten borrokan eta kalean jarraituko dutela, “gauak okupatzen eta jai eredua feministen alde borrokatzen”.
Erasoa salatu duten emakumeez gain, txoznagunean zeuden emakume denek indarkeria pairatu zutela adierazi dute jai batzordeko kideek: “Beldurra sentiarazi nahi izan ziguten”. Horren aurrean “kezkatuta” daude, izan ere, beldurra elikatzen duten mezuak zabaltzen ari dira egunotan. Horren aurrean saretu eta autodefentsa feministan indarra jarri behar dela adierazi dute.
Dena den, emakumeengan jartzen den ardura salatu dute: “Aski da! Nazkatuta gaude! Gizonezkoengan jarri behar da fokua. Gizonezkoek erasotzeari utzi behar diote eta indarkeria matxistan duten erantzukizunaz kargutu”.
Oiartzungo Udalak salaketarekin bat egin eta babesa adierazi zion jai batzordeari. Bien bitartean, txosna guztiak, baita plazakoak ere, itxita egon ziren 20:30etik 21:00ak arte, herritarren arbuioaren erakusle.
