[Bideoa eta galeria] Danbor eta barril hotsekin esnatu da Oiartzun
Gaztetxoen danborradarekin abiatu da Xanistebanetako Haurren Eguna. Plazan bukatu dute, eta arkume erre usaia antzeman zitekeen ordurako.
Done Eztebe plazan bukatu da gaztetxoen danborrada. 
10:30ean hartu du abiada 2022ko Xanistebanetako Haurren Eguneko gaztetxoen danborradak. Ergoiengo Jai Batzordeak eta Haurtzaro Ikastolak elkarlanean antolaturiko kalejirak oiartzuarrak esnatu ditu, bertoko jaien azken egunean.
Erriberene kaletik gora egin dute bidea gazteek, aurrean danborrak, erdian musikariak, eta atzean barrilak. Done Eztebe plazara heltzerako, soma zitekeen urrundik arkume erreen usaina. Bertan jo dituzte azken abestiak danborrariek, baina egun luzea dute oraindik aurretik txikienek, 11:30ean erraldoien kale buelta abiatu baita.
Eguerdian, Oiartzungo Herri Musika Eskolaren kale buelta eta arkume erretzea geroxeago. 14:30ean hasiko da arkume jatea, eta bertako argazki sorta ere bilduko du HITZAk.
Gosea egiteko, bitartean, horra hor danborradak Oiartzunen utziriko zenbait irudi, eta Arraskuelarre kalean hartutako bideo bat:
