Langile bat hil da Errenteria-Oreretan, aldamio batetik erorita
Atzo eguerdian gertatu zen istripua. Goiko Kalean berritzen ari diren fatxada batean lanean ari zela jausi zen.
Atzo, astelehena, 12:00ak aldera, Errenteria-Oreretako Goiko Kalean berritzen ari diren fatxada batean lanean ari zen 49 urteko langile batek istripua izan zuen. LAB sindikatuak salatu duenez, aldamioaren zama-igogailuaren hutsunetik jausi izanagatik hil zen.
Alboko argazkia ordukoa da. HITZAk jakin ahal izan duenez, gutxienez bi anbulantzia eta baita Ertzaintza ere bertaratu ziren gertakarien kokalekura.
Sindikatuak aditzera eman duenaren arabera, nahiz eta aldamioaren egitura eta muntaia legez araututakoa izan, barnean daraman zama-igogailuak ez zuen babes perimetralik. “Ohikoa da egoera hau”, arbuiatu dute, “kanpora begirako babesak jarrita egotea eta barnera begirakoak ezabatuta”.
Hildakoa obrako horma garbitzeko ari zen lanean, eta “errekurtso prebentibo” bezala izendatuta zegoela esan dute. Horri buruzko adierazpenak ere egin ditu batzordeak: “Errekurtso prebentiboaren funtzioak soilik segurtasun neurriak betearaztekoa da; patronalak, ordea, obrako edozein langile izendatzen du errekurtso prebentibo gisa, ardura hori desitxuratuz. Honela, arau guztiak apurtuz, inork ez ditu lan osasunerako neurriak betearazten eta istripu eta hilkortasun maila izugarri hauek betikotzen dira”.
LAB-ek gertaturikoa irmoki gaitzetsi du Twitterren: “Lan heriotzen sarraskiak ez du etenik. Gaur, urteko 48 eta 49. lan hildakoen berri izan dugu”. Horietatik bederatzi, altuera batetik erori izanagatik zendu dira.
Errenteria-Oreretakoaz gain, Elgoibarren, garraiolari bat hil da AP-8 autobidean azken orduotan, eta beste bat larri zauriturik dago.
Hori horrela, Osalan eta Lan Ikuskaritza zuzenean interpelatu ditu LAB-ek: “Non daude? Zer dio Eusko Jaurlaritzak ardura berea izanik? Beti bezala, ezer ez. Badirudi hildako langileen bizitzek ez dutela euren interesa pizten, edota beste udarako albiste batzuk erabili nahi dituztela anabasa estaltzeko”.
