Hamarretxetatik Gure Zumardia 21-25 tramurako sarbidea, moztuta
Joan den astean Mimos tabernaren aldeko Gure Zumardiko zatia moztu zuten; asteartetik aurrera, paralelo duen tramuan berbera egingo dute.
Azokaren fatxadaren kontra aparkatuta dauden ibilgailuak bertatik kendu beharko dira astearte goizean. 
Joan den astean Pasaiako Udaltzaingoak aditzera eman zuen Antxoko Hamarretxeta eta Gelasio Aranburu kaleak lotzen dituen Gure Zumardia kaleko bidegurutzeetako bat (Mimos tabernaren aldekoa) trafikoarentzat itxita egongo zela aldi batez. Egoera berbera errepikatuko da datorren asteartetik aurrera, azokaren bestaldeko bidean (BM supermerkatua dagoena).
Bestela esanda, Gure Zumardia 21 eta 25 zenbakien arteko tramua trafikoarentzat itxita egongo da, telekomunikazio zerbitzuen kanalizazioak desbideratzeko egin behar dituzten lanengatik. Mozketa datorren astearteko -hilak 16- 08:00etatik hurrengo asteko ostiraleko -hilak 26- 19:00ak arte indarrean egongo dela aurreikusi dute.
Egoerak dirauen artean, honakoak izango dira ibilgailuentzako arauak:
- Hamarretxeta kaletik Gure Zumardia 21-25 tramurako sarbidea trafikoari itxita egongo da, baina oinezkoek bertatik ibili ahalko dute.
- Gure Zumardiko eremu hori bi noranzkokoa izango da, betiere Gelasio Aranburu kaletik garajeren batera edota zamalanak egitera sartu behar dutenentzat.
- Gura Zumardiaren zati horretan, Azokaren fatxadaren kontra aparkatuta dauden ibilgailuak bertatik kendu beharko dira astearteko 08:00ak baino lehen.
- Gelasio Aranburu kaletik Nafarroa etorbiderantz doan bide osoa noranzko bakarrekoa izango da.
