Azoka eraikina eraisten hasiko dira aurki
Topoaren geltokia lurreratzeko obren baitan botako dute eraikina. Bertan egiten ziren jarduerak lekualdatuko ditu udalak.
Antxoko Azoka eraikina. Pasai Antxon, Euskotren zerbitzuaren geltoki berria ari dira eraikitzen, lurpean, Gure Zumardia plazaren azpian. Dagoeneko, Azoka eraikinaren barrualdea botatzen hasi dira, eta abuztuaren 24an, asteazkenean, kanpoaldea eraisten hasiko dira. Udalak jakinarazi duen eran, bi astez luzatuko dira obrok.
Etorkizunera begira, Azoka eraikinean garatzen ziren jarduerak bermatzeko, ekimen horien egoitza berria Visesaren eraikina izango da, Eskalantegi kaleko 45ean. Eraikin berrian zenbait egokitzapen egingo ditu horretarako.
Era berean, Pasaiako Udalak Gure Zumardiara begira dauden etxebizitzetako familiei leiho eta ateak itxita edukitzeko gomendioa luzatu die. Dena den, obraren ardura duen enpresari neurri guztiak hartzeko eskatu dio, eragozpenak gutxiengoak izan daitezen.
