Autobusak antolatu ditu Sanpedrotarrak, Play-offetara hurbiltzeko
Irailaren 17 eta 18an lehiatuko dituzte Eusko Label ligara igotzeko estropadak. Joan etorri bakoitzak 11-14 euro bitarte balioko ditu.
Sanpedrotarra, denboraldi honetan zehar. Abuztuaren 21ean 2022ko KAE1 ligako txapeldun bilakatu zen Sanpedrotarra, aurreko egunean Zarautzeko Bandera irabazi eta Bilbon zazpigarren denbora egin ostean. Orain, hilabetez prestaketa berezian dabiltza arraunlariak, eta irailaren 17 eta 18an Eusko Label ligara igotzeko kanporaketak lehiatuko ditu.
Kanporaketen harira, Sanpedrotarra Arraun Elkarteak busak antolatu ditu, Bermeo eta Portugaleten izango baitira estropadak. Irailaren 17an, Bermeora abiatuko den autobusa 15:00etan abiatuko da San Pedrotik, eta 15:10etan igaroko da Trintxerpetik. Biharamunean, ordea, goizeko 08:30ean abiatuko da San Pedrotik Portugaleterantz, eta 08:40ean Trintxerpetik.
Izena emateko, Sanpedrotarraren elkartean egin beharko da, irailaren 2, 5, 9 edo 12an; arratsaldeko 18:00ak eta 20:00ak artean. Autobus bakoitzak hamalau euro balioko ditu (hamaika bazkide nahiz laguntzaileentzat). Bi eguneko bonua egongo da salgai ere: hogeita lau euroan, hemezortzi bazkideentzat.
Honakoak dira Play-offen hitzorduak:
- Irailaren 17an, larunbatean: Eusko Label Ligara igotzeko Lehen Play-offa, arratsaldeko 18:10etan Bermeon.
- Irailaren 18an, igandean: Eusko Label Ligara igotzeko Bigarren Play-offa, eguerdiko 12:00etan Portugaleten.
