Digitalizazioari buruzko prestakuntza bideratuko du Oarsoaldeak
Garapen agentziak prestakuntza pertsonalizatua eta doakoa eskainiko die eskualdeko negozioei eta establezimenduei.
Prestakuntza digitaleko saioak abiatuko ditu Oarsoaldeak. Oarsoaldea Garapen Agentziak hiri ekonomiari zuzendutako doako prestakuntza pertsonalizatua abiatu du. Eusko Jaurlaritzako Lan eta Enplegu Sailak Lehentasunezko Jardun Zonaldeen esparruan diruz lagundutako Berpiztu Laneratze Poloa programaren barruan dagoen prestakuntza da.
Programaren xehetasunei dagokionez, aldez aurretiko ordubeteko diagnostikoa egin ondoren, berariazko gaitasun digitalen beharrak eta mailak zehaztuko dira, eta establezimendu edo negozio bakoitzari bost orduko prestakuntza ibilbide pertsonalizatua eskainiko zaio, aurrez zehaztutako premietara egokituta. Prestakuntza horretan, besteak beste, honako gaiak jorratuko dira: publizitate digitala, sare sozialen kudeaketa, online salmenta edota bilatzaileetako marketina.
Saio horietan 10 langile baino gutxiagoko mikroenpresek edo autonomoek har dezakete parte, eta bete beharreko baldintza da Orasoaldeko herriguneko kaleren batean jendeari irekitako lokal bat izatea.
Digitalizazioari buruzko prestakuntza jaso nahi dutenek estekako galdetegian eman beharko dute izena. Horrez gain, prestakuntza jasotzeko baldintzak betetzen dituzten eskabideen sarbide ordena errespetatuko da, prestakuntzarako ezarritako aurrekontua eta gehieneko edukiera agortu arte. Aurrekontua agortzen ez bada, gehieneko epea 2023ko ekainaren 30a izango da.
Jesus Mari Martiarena Oarsoaldea Garapen Agentziako presidenteak adierazi duenez, laguntza edo informazioa behar duten pertsonak garapen agentziarekin harremanetan jar daitezke bi modutara: 943 49 41 29 telefonora deituz (astelehenetik ostiralera 09:00etatik 14:00etara) edo Ibai Kortabitarte teknikariarekin harremanetan jarriz (ikortabitarte@oarsoaldea.eus).
