Eider Perez eta Juan Manuel Inziarte euskal preso oreretarrak Euskal Herrira hurbilduko dituzte
Zaragozako espetxean da egun Perez, eta Kantabriako El Dueson Inziarte. Jaurlaritzak erabaki behar du orain zein espetxetara eramango dituzten.
Eider Perez Espainiako Gobernuko Espetxe Zuzendaritzak eta Eusko Jaurlaritzak adostu dute beste hamahiru euskal preso Bizkai, Araba eta Gipuzkoako espetxeetara hurbiltzea. Horien artean daude Eider Perez Aristizabal eta Juan Manuel Inziarte oreretarrak. Egun, Zuerako (Zaragoza, Espainia) presondegian dago Perez, eta orain Jaurlaritzak erabaki beharko du Zaballako (Araba), Basauriko (Bizkaia) edo Martuteneko espetxera eramango ote duten Perez. Ez dute zehaztu noiz egingo duten espetxe aldaketa. Iniziarte, berriz, Kantabriako El Dueson dago, eta Jaurlatitzaren esku dago orain zein espetxetara ekarri.
2001eko martxoaren 30ean sartu zuten espetxean Eider Perez. ETAko kide izateagatik ezarri zioten 30 urteko zigorra betetzen ari da. 2023an beteko ditu zigor horren hiru laurdenak. Zuerako espetxera 2021aren hasieran emana zuten, 202oko abenduan jakinarazi zuelako Espainiako Gobernuko Espetxe Zuzendaritzak Algecirasko (Andaluzia, Espainia) presondegitik Zaragozakora mugituko zutela.
Juan Manuel Inziarte, berriz, 2009ko abuztuaren 6an espetxeratu zuten, eta hark ere 30 urteko espetxe zigorra du ETAko kide izateagatik. 2024ko irailean beteko ditu kondenaren hiru laurdenak. El Duesora 2021aren hasieran eraman zuten, Topas (Salamanca, Espainia) espetxetik.
