Saez eta Fernandez, bigarren Espainiako Txapelketan
Pasaia Kayakeko bikotea maratoi modalitatean lehiatu zen asteburuan, master kategorian. Iraila amaieran Munduko Txapelketan lehiatuko dira.
Eukene Saez eta Iñaki Fernandez, eskuinaldean, irribarretsu. Joan den asteburuan, Zamoran (Espainia) ur lasaietako piraguismoko maratoi modalitateko Espainiar Txapelketa ospatu zen, master kategorian. Bertan izan ziren Pasaia Kayakeko arraunlariak: Eukene Saez eta Iñaki Fernandez bikoteak parte hartu zuten.
Fernandezek larunbatean banakako frogan hartu zuen parte. Ibilbideak 18 kilometroko luzera zuen, lehorreko lau tarterekin. Urdinak ohorezko bosgarren postua lortu zuen, 01:27:01eko denborarekin, eta podiumetik hiru minutu eskasera.
Biharamunean, igandean, bikotea batera aritu zen K2 froga mistoan. Lasterketa hasi eta berehala jarri ziren buruan, Zumaiako bikotearekin batera. Ibilbide osoan jarraitzaileei denbora atera zieten bi bikoteek. Azken txanpan, ordea, zumaiarrek erasoa gogor jo eta helmugara 13 segundo lehenago iritsi ziren. Pasaitarren marka 01:09:30 izan zen. Lasterketa bikaina eginda, Espainiako Txapelketan zilarra lortu zuten urdinek.
Ilusio handienarekin, datozen asteetan gogor entrenatuko dute Saez eta Fernandezek. Izan ere, irailaren amaieran modalitate bereko Munduko Txapelketa lehiatuko dute, Ponte de Liman (Portugal).
