Aurrerapausoak, Pasaiako eremu guztiek zuntz optikoa izateko
Irailaren 7tik aurrera, Donibane eta San Pedroko alde zaharreko bizilagunek eskatu ahalko dute. Bestela, egungo lanak amaiera fasean daude.
Berdez, estaldura duten eremuak; horiz, prozesuan daudenak; gorriz, lanean ari diren guneak; eta laranjaz, irailaren 7tik aurrera eskatzeko aukera izango duen eremua. Zuntz optikoa Pasaiako eremu guztietan sartzeko lanak azken txanpan sartu dira. Irailaren 7tik aurrera, Donibane eta San Pedroko alde zaharreko bizilagunek zuntz optikoa izateko eskaria egiteko aukera izango dute. Era berean, amaiera fasean daude Bordalaborda, San Roke eta Lurdes Txiki kaleetako lanak; bertako herritarrek, beraz, aurki izango dute zerbitzua eskura.
Gune historikoetan aipatu moldaketa lanak egiteko baimen bereziak behar direnez gero, Izaskun Gomez alkatea pozik agertu da. “Helburua da Pasaitar guztiek Internetera baldintza onenetan sartzeko aukera izatea, funtsezko zerbitzua baita hainbat ondasun eta zerbitzu eskuratzeko” adierazi du.
Sarearen hedapena Telefonica egiten ari da, baina kontratazioa edozein konpainiarekin egin ahalko da.
