PSE-EEk Gazte Kultur Bonoa eskatzera egin die dei gazteei
67 lezoarrek beteko dituzte hemezortzi urte aurten. 400 euro inbertitzeko aukera lukete gazteek horren bidez, arte eta kultur produktuetan.
Joxean Sanchez, Lezoko PSE-EEko bozeramailea. Aurten, 67 lezoarrek beteko dituzte 18 urte. Lezoko PSE-EEren udal taldeak guzti horiei dei egin die Gazte Kultur Bonoa eska dezaten. Horrela, gazteek produktu eta esperientzia kulturaletan, presentzialetan zein digitaletan 400 euro gastatzeko aukera izango lukete: 200 euro zuzeneko arte produktu, kultura-ondare eta ikus-entzunezko arte lanetan; 100 euro euskarri fisikoa duten kultura produktuetan; eta beste 100 euro kontsumo digitalerako edo lineako kontsumorako.
Joxean Sanchez bozeramaileak adierazi du kultura bonua “gazteei kulturarako sarbidea errazteko eta kultura-kontsumoa sustatzeko asmoarekin” sustatu dela. Espainiako Gobernuaren egitasmoa da Gazte Kultur Bonoa.
