Gazteen artean euskara sustatzeko langile bila ari dira
Euskaraldia gazteen artean dinamizatzeko ardura izango du. Bihar izango da curriculuma bidaltzeko azkeneko eguna.
Aurtengo Euskaraldia hirugarrena izango da. Irudian, lehenengo ekitaldiaren aurkezpena. Azaroaren 18tik abenduaren 2aren artean egingo dute Euskaraldia, hirugarren aldiz. Aurtengo ekitaldiak hitza eta ekintza uztartuko dituela adierazi dute hizkuntza ariketa nazionalaren antolatzaileek.
Hitza eta ekintza aurrera eramateko langile baten bila ari dira Oiartzunen. Gazteen artean Euskaraldia sustatuko duen dinamizatzaile baten bila ari dira.
Bi baldintza bete beharko ditu. Alde batetik, 18 urteak beteta edukitzea. Bestetik, gazte taldeak dinamizatzeko gaitasuna izatea.
Astean zazpi ordu eta erdiko lan kontratua eskainiko dute. Ordutegia moldagarria izango dela jakinarazi dute.
Interesatuta daudenak Oiartzungo Euskaraldiaren talde dinamizatzailearekin jarri beharko dute harremanetan. E-posta bidez edo telefonoz (943 26 01 82 zenbakira deituta) egin daiteke kontaktu hori.
Euskara, kalera
Maiatzean aurkeztu zuten aurtengo Euskaraldia. 2022an euskaltzaleak kalera ateratzeak, euskararen aldeko ekimen jendetsuek eta euskararen ezagutza zein erabilera areagotzeko urrats sendoek berebiziko garrantzia dutela nabarmendu zuten orduan.
