Iturriozko bazterrak txukunduko dituzte, auzolanean
Bazterrak Txukuntzen taldeak oiartzuarrak deitu ditu iganderako, Iturriotz auzoko txokoetako zikinkeria jasotzeko.
Auzoz auzo ari dira hondakineko kontzientziazioa hedatzen. Bazterrak Txukuntzen egitasmoaren hurrengo geltokia Iturriotz izango da. Datorren igandean, hilak 18, elkartuko dira, Beheko Soroan, eta handik abiatuta, auzoan zikin aurkitzen dituzten txokoak garbituko dituzte. 09:30ean jarri dute zita.
Auzolana sustatzen duen taldeak zein udalak auzotarrak parte hartzera gonbidatu dituzte. Bertaratzen direnentzako, gainera, hamaiketakoa egongo dela iragarri dute.
Iturriozkoa izango da egitasmoaren seigarren geldialdia. Beste bi geratuko lirateke, beraz. Urriaren 16an Ugaldetxo txukunduko dute, eta azaroaren 20an Arraguarekin bukatuko dute.
Auzolan horien helburua ez da beste batzuek botatzen dutena garbitzea, baizik eta herritar guztiak kontzientziatzea, norberarengandik hasita herriko txokoak garbi manten ditzaten. Hala azaldu zuten apirilean, egitasmoa lehen urratsak egiten hasi zenean.
