[Galeria] Bestondoarekin, ganadu feria
Lezoko santakrutzetan ganadu feria egin dute gaur goizean. Baserritar giroa nagusitu da Goiko Plazaren inguruan.
Beharbada bestondoa hitza erabiltzea ez da ohikoa Lezon, baina gaurko egunari erreferentzia egiteko baliagarri izan daiteke. Baten batek bere hiztegira gehi dezake, gainera. Bestondo edo biharamunarekin altxa da gaur herria. Izan ere, atzoko Santakrutz Egunak arrastoa utzi du herritarren artean, batez ere kuadrillen arteko bazkarian (eta ondorengoetan) izan zirenen artean. Ganadu feria zegoen gaur goizean jarrita Josetxo Etxandi pilotalekuaren inguruan, eta egia esan, gazte-gazte askorik ez zen bertan.
Behiak, idiak, ahuntzak, behorrak eta bigantxaren bat ere ekarri dituzte herrira gaurkoan, herriko eta kanpoko baserrietako egitekoen eta ohituren zaleen gozamenerako. Horiek arretaz ikuskatu dituzte abereak. Abereek ere so egin diete bi hankadunei, zer pentsatzen zuten asmatzea zail zela.
Animalien erakustaldiaren ondoren, idi-demaren goizeko txanda iritsi da, eta ondoren eman dizkiete ganadu erakargarriena ekarri dutenei sariak. Bazkaltzera bilduko dira geroago, Ixkulin eta Tiñelu elkarteetan.
Goiza animalia trazakoa izan bada ere, egunak emango du gehiago. Behean, gaurko egitaraua, eta biharkoa. Ondoren, gaur goizeko argazki galeria.
Gaurko (osteguna) egitaraua
- 14:00. Baserritarren bazkariak Ixkulin eta Tiñelu elkarteetan.
- 16:30. Herri kirolak, gazteentzat, Kale Nagusian eta Atzekoaten.
- 18:00. Idi dema probalekuan.
- 18:30. Formol konpainiaren ‘Album’ antzerkia Karlos Saldise plazan.
- 20:00. Bertso saioa Gurutze Santuaren plazan: Andoni Egaña, Sebastian Lizaso, Oihana Iguaran eta Nerea Ibarzabal.
- 21:15. Mozorro afaria Karlos Saldise plazan.
- 22:00. Play Back lehiaketa Karlos Saldise plazan.
Biharko (ostirala) egitaraua. Larunbateko eta igandeko ekitaldien zerrenda ikusteko klik egin hemen.
- 12:30. Paella txapelketa Jauregialde plazan.
- 18:00. Josetxo Etxandi pilota oroitaldiko herri mailako kategorien finalak, Josetxo Etxandi pilotalekuan.
- 19:00. Buruhandi eta erraldoien kalejira Karlos Saldise plazatik.
- 20:00. Kartelada Gurutze Santuaren plazan.
- 20:00. Musika Eskolako taldeen kontzertuak: Gotzen, Ordu Txarra eta Jaig.
- 22:00. Euskal musika taldeen topaketa Karlos Saldise plazan.
- 01:30. DJ Txillardegi Karlos Saldise plazan.
