Meipiko igogailua "lan gogorraren emaitza" dela esan du Osak
2023a baino lehen esleituko diren lanak aurrerapausotzat jo ditu jeltzaleen eledunak, komunikazio eta irisgarritasun arloetan bereziki.
“Meipiko igogailuaren lizitazioa aurrerapauso handia da auzoak komunikatzeko eta irisgarritasuna bermatzeko”. Hala balioetsi du Pasaiako EAJko bozeramaile eta Hirigintza zinegotzi Loreto Osak berriki jakinarazitako hirigintza erabakia.
Izan ere, udal arduradunek atzo eman zuten aditzera Lezobide eta Bordalaborda kaleak lotuko dituen igogailua eraikitzeko lanak urtea bukatu baino lehen esleituko dituztela, eta jeltzaleen eledunak “oso balorazio positiboa” egin du lehen fasearen lizitazioa argitaratu delako.
“Gogor lan egin dugu”, aitortu du Osak, “eta prozesu luzea izan duen proiektu bat abian jarri da”. Aurrerapausotzat jo du etorkizuneko azpiegitura, eta sinetsita agertu da auzoaren komunikazioa eta sanjuandarren bizi-kalitatea hobetzeko balioko duela igogailuak. Bereziki barrutiaren goialdean bizi diren lagunek nabarituko dute hobekuntza.
