[Argazki galeria] Atlantikaldiak herriko kaleak hartu eta girotu ditu
Arratsaldean "Dkode" eta "Puntu iraultzaileak" tailerrez gain, bisita gidatuak egingo dituzte. Gaualdean kontzertuen txanda izango da.
Atzo, osteguna, ekin zioten Atlantikaldia jaialdiari. Hainbat eta hainbat jarduera egin zituzten Foru plazan, alde zaharrean eta Itsasargi nagusian.
Gaur eta bihar izango dira, ordea, herria ekimenez beteko dituzten egunak. Izan ere, gaur arratsaldetik biharko gauera arte ez du etenik izango proiektu kulturalaren egitarauak; eta jendea barra barra jasotzeko egokitu dituzte lau gune nagusiak dagoeneko.
Eskaintza nagusiak gaualdean helduko dira, kontzertuetan: Marina Landa donostiar bakarlaria Herrixkan arituko da, 21:00etatik 22:00etara; Herriko plazan, Palmerita Coco Blue 22:00etan; Tanxugueiras eta Neomak Itsasargi Nagusian gaueko 23:00etan; eta Hijas de la Cumbia Panierren, 00:00etan abiatuta.
Bestela, orotariko eskulan tailer, bisita gidatu (Errenteria-Oreretaren Erdi Aro eta Aro Modernoko garai historikoei nahiz industrializazio prozesuari buruz) eta ikus-entzunezko emanaldiak eskainiko dituzte herriko kaleetan zehar. Egun guztietako egitaraua Atlantikaldiaren weborrian ikusi daiteke. Gainera, antolatzaileek egunez eguneko galeria osatzen ari dira. Hemen sakatuta ikusi daitezke argazkiok.
HITZAk arratsaldeko giroaren irudiak bildu ditu: “Dkode” tailerrak, Polinesiako mapa ederrak eta estandarteak egiteko; eta “Puntu iraultzaileak”, morse itsas kodea ezagutzeko.
