[Erreportajea] Sukaldian, munduko gastronomien topaketa
Atlantikaldiko egitarauaren barruan dagoen jardueretako bat da. Bertan, jatorri ezberdineko herritarrek euren herrialdeko jakiak egiten dituzte, ondoren Foru plazan dastatzeko. Bihar da topaketa.
Atlantikaldiak eztanda egin du dagoeneko. Kultur topagune eta musika jaialdia martxan da, eta indartsu dator, 70-75 ekintzekin. Horietako bat Sukaldian topagune gastronomikoa da. Javi Rufo Alabergako Arditurri Elkarteko kide da, eta Sukaldian egitasmoa antolatzen dabil. Hainbat herrialdetako gastronomia biltzen dituen topaketa Atlantikaldian urtero presente dagoen jardueretako bat da, eta Rufok egitasmo horren gakoak azaldu ditu: «Alde batetik, jendeari gure elkarteetako kultura eta funtzionamendua erakusten dizkiegu. Bestalde, guk hemengo pintxo edo plater bereizgarri bat prestatzen dugu, eta herrian errotuta dauden jatorri ezberdinetako kideek euren herrialdean edo kulturan tipikoa den plater bat prestatzen dute».
Egitasmoan parte hartu duen elkarteetako bat da Alabergako Arditurri, Javi Ruforen elkartea. Arditurriren kasuan, Nepaleko herritarrak egongo dira haiekin batera kozinatzen, eta onartu du sortzen den elkartrukea «oso aberasgarria» dela: «Elkar ezagutzeko aukera izan dugu, eta oso aberasgarria izaten ari da elkartruke hori. Guk gure gastronomia ezagutarazten diegu, eta haiek eurena erakusten digute. Urteak daramatzagu proiektu honekin, eta merezi du, oso esperientzia ona da».
Nepalez gain, Maroko, Ukraina, Ijito Herria, Mexiko, Nigeria edo Pakistan dira egitasmoan ordezkatuak dauden herrialdeak eta kulturak, eta herriko elkarteekin batera ariko dira kozinatzen. Lehen egitekoa elkarteen barruan gauzatzen da. Elkartruke horretan, herrialde bakoitzeko ezaugarriak dituen 100 pintxo prestatzen dira elkartetan, ondoren Foru plazako Herrixka gunean saltzen direnak. Sukaldian egitasmoa bihar izango da, eta pintxoak 14:00etatik 15:00etara dastatu ahal izango dira, euro bateko prezioan. Biltzen den dirua Zaporeak egitasmoarentzat izango da.
Elkarteetara joan daiteke
Rufok azaldu du udalak urtero zerrenda bat irekitzen duela jendea apuntatzeko, eta elkarteetan gauzatzen diren sukaldaritza ikastaro horietara bertaratzeko: «Jende asko dator urtero, eta asko herritik kanpokoak dira. Pintxoak egiten laguntzen dute, errezeta horiek ezagutzen dituzte, eta esperientziak elkarbana ditzakete. Datorren jendeak kontent bukatzen du».
