Ostiralean, bigarren eskuko bizikleten azoka
Europako Mugikortasun Iraunkorraren Astearen baitan, arratsaldean azoka egongo da Gamon zumardian. Hainbat ohar helarazi dituzte.
![](https://oarsoaldea.hitza.eus/site/files/2022/09/txirrinda.jpg)
Errenteria Europako Mugikortasun Iraunkorraren Astean murgilduta dago, hainbat jarduera antolatuko baitituzte astean zehar. Horren harira, ostiralean, hilaren 23an, bigarren eskuko bizikleten azoka egingo dute arratsaldez, 16:30etik aurrera Gamon Zumardian.
Antolatzaileek hainbat ohar zabaldu dituzte, bizikleta saldu nahiz erosi nahi dutenentzat baliagarria izan daitekeelakoan:
- Azoka 20:30ak arte egongo da zabalik.
- Bizikleta saldu nahi dutenentzat, nahitaezkoa da atari honetan izena ematea eta fitxategia betetzea. Horiei bizikleta uzteko ordutegia esleituko zaie.
- Bizikletak eta patineteak uzteko gordailuaren ordutegia 15:00etatik 16:30era izango da.
- Egoera onean dauden bizikleta eta patineteak onartuko dira bakarrik.
- Norberaren datuak eskatzeaz gain, parte hartzaileek adin nagusikoak izan behar dute.
- Azokan sartzea doakoa izango da, eta salneurriak 500 euro artekoak izango dira.