Datorren astean zehar ospatuko dute Asteklima
EAEko beste hainbat udalerrirekin batera ospatuko du Errenteriak Asteklima. Hainbat jarduera antolatu dituzte, astelehenetik ostegunera.
Asteklimaren aurkezpena, gaur eguerdian Beraunen. Euskadiko hainbat udalerri eta eragilek antolatuta, datorren astean zehar Asteklima izeneko ekimena antolatuko da hamaika udalerritan. Horien artean dago Errenterian, eta oarsoaldeko udalerriak Komunitate Energetikoak izango ditu protagonista. Izan ere, Errenteriako Energia Komunitatea sortzeko oinarriak zehaztu dira dagoeneko, eta ondorioz, datorren astean zehar beronen berri izateko aukera izango dute herritarrek. Errenteriako Udalaren arabera, ekimen hau jasangarritasunaren eta ingurumenaren aldeko ekimenak babesteko duen konpromisoaren beste adierazpen bat da.
Honako jarduerak antolatuko dituzte datorren astean zehar:
Irailaren 26a, astelehena
- 17:30ean, Lekuona Fabrikako lehen solairuko plaza berdean: “Nik maite dut natura” ipuin kontalaria. Klima aldaketaren eraginez natura zaintzeak duen garrantziaz hausnartzeko kontakizun aproposa. 3 eta 8 urte arteko umeei zuzenduta dago bereziki, baina edozein bertaratu liteke.
Irailaren 27a, asteartea
- 18:30ean, Reina Aretoan: “Energia komunitateak eta autokontsumoa” hitzaldia. Goienerrek eskainia, autokontsumo eredu ezberdinak azalduko dituzte.
Irailaren 28a, asteazkena
- 10:00etan, udaletxean: “Klima aldaketari aurre” erakusketa. Klima aldaketaren sorrera, bilakaera, arrazoiak, ondorioak… Horien guztien inguruan hausnartzeko 24 mural aurkeztuko dira.
Irailaren 29a, osteguna
- 18:30ean, Reina Aretoan: “Energia komunitateen esperientzia praktikoak” hitzaldia. Hernani eta Azpeitiko Energia Berriztagarrien Komunitateek haien sortze prozesuak azalduko dituzte, eta Errenteriakoaren prozesuaren nondik-norakoen berri emango da ere.
Jarduera guztien inguruko informazio osoa hemen sakatuta eskura daiteke.
Udalak maiatzean Errenteriako Klimaren eta Energia Iraunkorraren aldeko Ekintza-plana onartu zuen, zeina 148 ekimenek osatzen duten. Orduan, lau ardatz nagusitan banatu zituzten ekimenok: eraginkortasun energetikoa, mugikortasuna, energia berriztagarriak eta hiri-ingurunea eta azpiegiturak.
