300 kilogramo zabor gutxiago ditu badiak Seabinari esker
Lanean eman dituen bi urte hauetan, 1,45 kg hondakin jaso ditu egunero itsas zakarrontziak. Ezagutza zientifikoa hobetzea ere ahalbidetu du.
San Pedroko kaian dago amarratuta Seabina. 
Bi urte daramatza badiako ur gainazala iragazten itsas hondakinak biltzen dituen Seabin Pasaia itsas zakarrontziak. Mater Ontzi Museo Ekoaktiboaren gailuak 1,45 kilogramo zabor bildu ditu batez beste egunean, denera ia 300 kg erretiratuz badiako uretatik.
Itsas kutsadura murrizteaz gain, ezagutza zientifikoa aberasteko tresna ere bada Seabina, bildu dituen 180.000tik gora hondakin banan-banan aztertu baitituzte barkuko adituek, horiek zenbatu eta tipologiaren arabera sailkatuz.
Arduradunek adierazi dute Bizkaiko Golkoko lehena den gailua oso baliotsua dela, halaber, itsas hondakinen arazoa ikusarazi eta jendea horrekiko sentsibilizatzeko. “Izan ere”, azaldu dute, “badiako urak garbia dirudien egunetan ere, Seabinak mikroplastikoak, zigarrokinak, sokak, litxarreria-poltsak eta itsasoan normalean aurkitzen diren beste hondakin mota asko biltzen ditu”.
Tipologia
Bi urte hauetan gehien bildu duena mikroplastikoak (3 eta 5 milimetro arteko plastikoak) izan dira, eta horien ondotik 50 zentimetro arteko plastiko hondakin handiagoak. Atzetik, ura zikintzen duten hondakin maizkoenak tabakoak sorturikoak dira: plastikozko tabako bilgarriak eta zigarrokinak, hain zuzen ere.
Esandakoen ondotik, litxarreri poltsak, globoak, elikagaien bilgarriak, estalki eta tapoiak edota fruten pegatinak ere jaso ditu ere Seabinak azken bi urte hauetan, Pasaiako uretan.
