Kultura eta udazkena, biak indarrez Lezon
Urritik abendura 24 ekitaldi jasota daude Lezoko kultur egitarauaren barruan. Lagun Txartelarekin hainbat abantaila eskura ditzakete lezoarrek.
Ion Pombar, Jesus Mari Martiarena, eta Xanti Val, programaren berri emateko agerraldian. Udazkeneko datetan sartzearekin batera, antza, udazken klimatologikoa ere iritsi da. Bada Lezon udazkenak ezaugarriren bat badu, hori da kultur proposamen asko eta asko izaten dituela. Hala izanda azken urteetan, eta horrela izango da aurten ere. Gaur aurkeztu dute urte sasoi hasiberrirako ekitaldiak Jesus Mariarena alkateak, Ion Pombar Kultura zinegotziak, eta Xanti Val Kultura teknikariak.
Udal arduradunek egitarauaren traza nagusiak eman dituzte gaurkoan (egitarau horren deskargarako, klik egin hemen). Aurretik, ordea, Kilometro Lezori erreferentzia egin dio alkateak, esanaz kultur jaialdi horren hirugarren ekitaldia –17 jarduera jasota zeuden bertan– oso baikor joan dela, eta gainera, COVID-19aren aroa atzean utzi ahal izan dela, “normaltasun handienean ospatutakoa izan da”. Horrekin lotuta, Santakrutz Jaietako 64 ekitaldiak aipatu ditu Xanti Val teknikariak, eta orain, udazkeneko egitarauaren barruan, beste 24 egingo direla. “Askotan errepikatzen badugu ere, kultura sustatzen jarraitu nahi dugula argi dago. Herriak kultura behar du, horregatik, kultur egitarau guztietan aldaketak eta berrikuntzak egiten ditugu”, zehaztu du Ion Pombar Kultura zinegotziak.
Egingo direnen artean, Poesia Kaiaren bigarren ekitaldia, Jardunaldi Feministak, literatur solasaldiak, antzerki emanaldiak (bederatzi), dantzakoak (bi) eta zinemakoak (sei) nabarmendu dituzte. Horiekin guztiekin batera haurrentzako antzerki saioak, edo Lezoko Zinema Ttikiaren barrukoak izango dira herrian.
Jarduera zerrenda osoa etxeetako postontzietan jasoko dute lezoarrek, idatzizko euskarri fisikoan. Baina ekitaldien berri izateko beste bi bide daudela oroitarazi dute udal ordezkariek. Lehena udalaren webgunean arakatzea da, bestea udal erakundearen App-an kontsulta egitea. Bi bide horietatik, gainera, sarrerak eros daitezke.
Lagun txartela
Gezala Auditoriumean egingo diren ekitaldien prezio orokorra 8 eurokoa da (helduentzako jardueretarako batez ere). Baina Lagun Txartelaren jabeek, tiketak merkeago eskuratzeko aukera izango dute. Adibide bat: Gezalako 8 euroko ikuskizunetan, 5 euro ordaindu behar dituzte txartelaren jabe direnek. Gainera, euskarri hori izanda sarreren salmentan lehentasuna dute horren jabeek. Txartelaren gaineko informazioa udalaren webgunean edo Kultura Sailaren bulegoan lor daiteke.
