Elkano Itsas Herriak Pasaian bukatuko du kultur zeharkaldia
Joan den ekainetik 30 bat herri bisitatu ondoren, euskal kostaldeko bidaia bukatzear da. Pasaian hartuko du lur igandera bitarte.
Euskal kostaldeko 30 herri ingurutan egin du geldialdia Elkano Itsas Herriak, Pasaian baino lehen. 
Joan den ekainetik Gipuzkoako, Bizkaiko eta Lapurdiko 30 bat herri bisitatu ondoren, Pasaian bukatuko da Elkano Itsas Herria kultur zeharkaldia. Egunotan erakusketa, ipuin kontaketak eta formatu txikiko pastorala egingo dituzte, Euskal Herriak itsasoarekin duen harremana berreskuratu asmoz.
Erakusketa 30 panelek osatuko dute, udan zehar bisitatu dituzten herrietako ezaugarri adierazgarrienak jasotzen dituztenak eta itsasoarekin lotutako bizimodua biltzen dutenak. Pasai San Pedroko plaza berrian, lonjaren aurrekoan, egongo da hori ikusgai, bihartik igandera bitarte.
Lehen mundu biraren historia publiko gazteenari gerturatzeko, Ixabel Agirresarobe kontalariak eta Iñaki Martiarena Mattin ilustratzaileak sortutako Elkarrekin Elkano ipuin kontakizunaren emanaldi bikoitza izango da gaur eta bihar. Xehetasunak, hemen.
Azkenik, hilaren 7an Donostian estreinatu ondoren, Mitxel Etxekoparren Ketariatik mundura formatu txikiko pastorala Donibanen ikusi ahal izango da gaur, hilak 28, 18:00etan, Juanba Berasategi aretoan.
