Zerga eta tasak izoztuko dituzte elkarren segidako hirugarren urtez
Aurten ere udal tasa eta zergak izoztea proposatu du udal gobernuak, Ahal Duguren babesarekin. EH Bilduk uste du hori ez dela nahikoa.
Pasaiako udalbatza, atzoko ohiko plenoan. 
Elkarren segidako hirugarren urtez, 2023rako ere udal tasa eta zergak izoztea proposatu du PSE-EE eta EAJk osaturiko udal gobernuak. Joan den urteko egoera errepikatu zen atzoko osoko bilkuran, bozkatzerako orduan: Ahal Duguk alde egin zuen, eta EH Bildu, ordea, abstenitu egin zen, neurri horrekin aski ez dela iritzita.
Aipaturiko bozkekin, behin-behinean onartu zen zerga ordenantzen aldaketa. Neurriaren helburua inflazioak eragindako prezio igoerak arintzea dela esan du aliantza politikoak, “herritarrei karga gehiago ez jartzearren”. Aldaketa jendaurrean jarriko da eta, alegaziorik aurkeztu ezean, behin betiko onartu eta indarrean jarriko da.
EH Bilduren abstentzioa
Iraitz Pazos mintzatu zen bilkideen izenean, euren abstentzioaren arrazoiak azaltzeko. Koalizio abertzalearen ustetan, udalaren helburua herritarrei zerbitzu publiko ahalik eta onenak eskaintzea litzateke, eta, ahal den heinean, “udal aberastasuna banatzea herritarren artean”. Hartutako neurriak esandakoak bermatzen ez dituela uste dute.
Azken aldian familien egoera sozioekonomikoa nabarmen zaildu bada ere, argi dago badirela sektore batzuk egoerari etekina ateratzen ere asmatu dutenak. Premisa horretatik abiatuta, EH Bilduk uste du zergak izoztuta gehien duenari “mesede” egitean zaiola, eta ez dela pertsona zaurgarrien egoera “inola konpontzen”.
Horregatik, tasen progresibitatearen alde egin dute berriro ere: gehien duenari gehiago eskatzea. Iaz ere eskakizun bera egin zuen oposizioko alderdiak, eta aurrerapausorik egin ez dela iritzita hartu dute abstenitzeko erabakia. “Izozte hutsak familia eta pertsona zaurgarrienei ez baitie mesederik egingo”.
